男人心度行 -不想結婚的五個最大原因

六妹

《男人心度行,不想結婚的五個最大原因》

 

一對男女行到咁上下,結婚問題多數會成為分手導火線。感覺上多數係「女仔一想結,男人就想撇」。但事實上男人點解咁驚結婚,有時好複雜,但亦可以好簡單。

 

  1. 有一生一世嘅覺悟;冇一生一世嘅把握

普天下男人都覺得,「離婚」最蝕底嘅都係自己。(事實當然係case by case)所以佢哋覺得個責任好大,同埋男人多數鍾意懶諗得遠,自然會生出「呢一刻愛你,但十年後呢?」呢種冇可能有答案嘅問題。

於是?佢咪想縮囉!

 

2. 有一生一世嘅感情;但冇結婚嘅需要

亦有一種男人睇得比較化,佢真係唔差,亦冇做咩壞事,對個女仔都好。但講到結婚,佢就會好輕描淡寫,反問一句:「有需要咩?」你一諗,係喎……好似又有道理喎。佢份人又鍾意低調,你兩個又唔諗住擺酒,佢又唔介意同你同居,錢就兩份使。咁……佢真係諗住同你行落去,只係麻麻哋太制度化一段感情。

當然,你會用經典對白:「第日你有咩事,我都唔可以幫你簽紙做手術!!」不過佢又會微笑安慰你:「唔怕,打畀我阿媽囉~」係,可能佢就係將一切簡化咗,但呢類人的確存在。

    

3. 想同你有將來;但佢更回味過去

佢愛你,但唔係最愛你。佢好清楚自己,早就遇上咗一生最愛嘅人,而且已經錯過埋。不過自己心知最愛嘅係邊個,自然唔敢輕易接受你嘅討託終身。需知男人中都有啲偏向感性,佢冇對你唔住,只係接受唔到,一個過去嘅束縛。

   

4. 有一生一世嘅把握;冇一生一世嘅能力

佢冇錢。係,講完架啦。係好慘,但喺香港就係咁現實。佢想娶你,都想你風光。莫講話未買到樓,可能酒席錢都要搵朋友幫住手先。加埋仲想生BB呢?根本婚紗未動,糧草已經先行。佢真係想結婚,只係呢一刻,佢真係未有能力。

但如果雙方都係真愛,就等啦。佢會為你,努力落去。

   

5. 冇感情;冇需要;冇覺悟;冇把握;冇將來;冇過去;冇能力

根本就唔愛你。係,佢係你男朋友。但你令佢冇結婚嘅衝動,比起一生一世嘅身分,或者佢已經揀咗成為你人生嘅過客。現代人嘅感情,有時比想像中更脆弱,感情,雖長亦不深。

==========

愛情係冇一條公式嘅,好多人話結唔成婚,係女仔或男仔有問題。其實仲有好多因素。

不過呢啲嘢,當事人知就得啦。

YOU MAY ALSO LIKE