催淚文!朝霞給哥哥、刁蘭、段迎風的信

Yufi Yip

大台劇《城寨英雄》勁HIT,帶挈主角胡定欣、陳展鵬、袁偉豪及王君馨等人氣急升,劇集進入結局篇,不少主角都難逃一死,而昨晚「朝霞」王君馨為了查出「牙佬段迎風」袁偉豪滅門的主謀,最終慘死收場,臨終前更看着被打盲的哥哥「拳佬」陳展鵬呼喊着自己,非常慘情。

入行九年,終有代表作的王君馨都十分入戲,在網上以朝霞的身份寫信給哥哥、牙佬及「刁蘭」胡定欣。




朝霞給哥哥的信:

哥!好開心咁多年後都可以見返你!喺我地相認呢段日子裡面好感受到你對我嘅照顧同愛。希望你唔好為左我報仇,好似我為啊爸啊媽咁 冇左自己嘅人生。記住要好好照顧三姨婆,得閒買多啲茶粿俾佢食!同埋,刁蘭真係一個好好嘅女仔,值得你一生一世保護同愛錫她!我代你原諒左佢啦,聽阿妹話,快啲同刁蘭結婚 等三姨婆可以飲番杯新抱茶!仲有, 你原諒阿風啦, 佢屋企人唔喺度,一時間接受唔到先會做左一個錯嘅決定。你係佢唯一嘅好朋友,你要體諒佢,照顧佢,搵返個好女仔俾佢,等佢唔使一個人孤零零。我唔喺度,你記住唔好再咁百厭,要繼續開開心心生活落去!

                         永遠掛念你的阿妹,
                                                朝霞




朝霞給刁蘭的信:

刁蘭,我可以叫你啊嫂嗎? 你應該都唔會拒絕嘅。 雖然我地相識嘅日子唔長,但我睇得出 你係一個有情有義嘅人,好照顧身邊需要幫忙嘅人,而且對啊哥一心一意,希望你可以幫我好好照顧佢。雖然佢有時有些小朋友脾氣,做嘢又衝動 唔經大腦。但佢好顧家架!係出邊賺嘅錢全部都會畀晒你,好好保護你,等你可以無後顧之憂。快啲同阿哥生番幾個小朋友俾三姨婆玩,祝你們可以永遠幸福咁生活落去!

                                                 朝霞上




最點少得朝霞一生中最愛的段迎風!

親愛的迎風,

多謝你,多謝你係我生命中出現。你對我的愛護和信任喚醒了我的心。 以前我的世界只有黑和白,但你的出現 為我的人生添上了色彩。那支藥油、那對繡花鞋、那壼芽菜湯... 這一切你為我貼身準備的禮物 我全都收到。很掛念我們一起練八極拳、踩單車、行沙灘的時光。可惜我們相處的時間實在太少。看見你一個人坐在大牌檔 我個心好痛 好想抱着你 同你講呢一切都會過去,但我做不到。對不起,一萬個對不起!多謝你,一萬個多謝你!

我最後的心願就係希望你同啊哥可以和平共處,凡事都有商有量 一齊好好守護城寨!做真真正正的城寨英雄!

                               永遠愛你的,
                                                  朝霞/花曼




最後,王君馨終於抽離角色,跳出嚟表示有啲野想講,她寫道:「快啲打爆歐瑞偉個頭!*即係砵仔糕老闆* 佢先至係終極Boss!!!」



好緊張呀!究竟最後是邪不能贏正,還是好人無好報呢?

YOU MAY ALSO LIKE