情侶拍拖好去處「Our Sanrio Times」展覽7月陪你回憶童年!

HY

情侶拍拖唔知去邊好?不如近近地去澳門啦!Hello Kitty、Little Twin Stars、Melody、布丁狗、梳乎蛋… 呢啲一路陪住我地長大嘅角色,喺今個夏天,我哋又可以一次過見曬佢哋啦!

Sanrio香港嚟緊喺7月28日至9月3日將會第一次喺澳門新濠影滙舉辦大型主題展覽「Our Sanrio Times」,一次過邀請曬Sanrio 300幾個成員到場,展出差唔多400件港、日、美嘅經典珍藏,同大家懷緬一吓童年嘅美好時光! 嘩,咁大咁多嘢睇,唔知行唔行得曬呢?唔緊要,而家率先喺度同大家介紹一吓先!

  

情侶拍拖影相位 1:

懷舊Sanrio號列車

 

要勾起大家嘅童年回憶,展覽當然唔少得懷舊嘅元素啦!「Sanrio小鎮」係今次展覽嘅重點園區,入面停泊咗一架有懷舊復古風嘅Sanrio號列車,係依照東京五反田喺70年代開業嘅Sanrio Gift Gate嘅裝置做藍本,唔知大家又有冇印象呢?

 

情侶拍拖影相位 2:

Sanrio時光隧道

小鎮入面仲會出現100多位成員,大家到時要捉實佢地影相,唔好走漏眼呀!Sanrio家族有咁多成員,相信連忠實fans都未必識曬!「Sanrio時光隧道」就會擺出100個由70年代到而家誕生嘅成員嘅繽紛拼貼,帶大家進入回憶寶庫之餘,又睇吓你地認唔認得曬佢地?另外喺「封面照相館」大家仲可以一嘗做封面主角嘅滋味𠻹呀!

 

情侶拍拖影相位 3:

懷舊文具屋

無論男仔女仔,細細個都一定有用開Sanrio嘅文具。呢間「懷舊文具屋」就出示所有Sanrio推出過嘅經典文具產品,帶大家去返青蔥嘅學生時代回味一下!

 

情侶拍拖影相位 4:

珍藏展品

 

除咗現場400多件珍藏展品之外,Sanrio第一件售賣嘅商品 - Hello Kitty小錢包嘅仿制品亦都會首次喺澳門展示,啲回憶返曬嚟啦!

 

情侶拍拖影相位 5:

公仔紙變變變

齋睇唔夠喉?係時候同佢地互動一吓!喺「公仔紙變變變」場景大家就可以做返細路仔,同朋友一齊玩摺紙,幫Kiki同Lala紙公仔變出唔同嘅造型!
另外,大家仲可以喺「繪畫教室」學習一下由Sanrio日本總部的設計師團隊特意為展覽親筆畫嘅手繪,你哋都可以跟住佢地畫出你最鐘意嘅人物㗎!另外,設計師團隊更加會直筆示範一筆一劃畫出9個較受歡迎嘅家族成員,連同7、80年代唔同角色嘅彩色手繪放喺「手繪展覽室」展示,好有欣賞價值!

 

情侶拍拖影相位 6:

士多啤梨新聞室


 

今次展覽場景眾多,仲有等大家可以一覽昔日嘅Strawberry News「士多啤梨新聞室」;拜訪士多啤梨大王的「士多啤梨事務所」同埋以澳門特色文化及文化遺產作為拍攝場景嘅「Sanrio遊澳門」。 可以勾起童年回憶,又可以見返咁多角色,同佢地互動一番,抵玩!

 

 

睇完唔捨得佢哋?唔驚!喺「Sanrio Gift Gate」仲有唔同角色嘅商品售賣,全部都係會場限定,獨家發售㗎,咁有紀念價值,梗係要帶佢哋返屋企啦!

 

介紹完,大家係咪心郁郁想去呢?門票而家已經開始預售啦,大家快啲Click入佢哋網站買飛啦: www.oursanriotimes.com


Our Sanrio Times展覽詳情:

展覽日期 :2017年7月28日至2017年9月3日

開放時間 :星期一至四:上午10時至晚上8時(最後入場時間晚上7時30分)

               星期五至日:上午10時至晚上9時(最後入場時間晚上8時30分)

地點       :澳門澳門路氹連貫公路新濠影滙 8號轉播廳

預售日期 :6月23日(上午10時正)起至7月27日 

YOU MAY ALSO LIKE