有冇發現,好多廣東話歌其實融入咗你嘅生活

新北由紀

《有冇發現,好多廣東話歌其實融入咗你嘅生活》

 

記得好多年前,地鐵車廂之內,我正向朋友講述一段奇遇,去到精彩部份!

我吐出一句:「突然之間!」

「很喜歡你恨我!」佢真係突然之間搶答,無拿拿接落一首歌度。

 

我立即喪笑,奇遇都變得乏味。

 

好多時,首歌聽得多,佢最響耳嘅部份,就會融入心底,成為聽眾嘅一個小共鳴。

 

又記得一次,台上司儀唔知講到咩話題,噏咗一句:「嗱……分開簡單……」

聽到呢句,台下嘅人心底好似都響起一句說話,但又唔敢講出口。

反而個司儀細細聲講:「抹去往事極難……」

 

結果,全場又係笑到停唔到。司儀仲要加多句:「嗱,份稿真係冇夾過呢句㗎!」

當然,例子仲有好多。曾經,我哋聽廣東話歌聽到成魔。

一首歌紅,你好有信心係全香港都聽過。

 

那時嘅頒獎禮,你必然緊張,因為真係爭崩頭。

但對比呢家,分分鐘得獎歌你都未聽過。

 

每樣嘢,都有興衰期。廣東話歌的確唔似當年咁興盛,但唔代表佢唔會再興盛過嚟。

 

縱使音樂難做,至少我哋仲見到好多音樂人依然努力,甚至拎埋條命出嚟做音樂,注入不少全新原素。

 

有感好多樂迷因為近年冇聽開廣東話歌,而對新歌都卻步。

不過連聽一次嘅機會都唔畀佢,我哋又點可以再創盛世?

 

入心嘅舊歌好多,

但大家都希望,入到你心嘅新歌都會愈嚟愈多。

 

 Credit: 《今日MV》、《重覆犯錯MV》、《木紋MV》、《I Miss You MV》、《葡萄成熟時MV》、《痛愛MV》、《思覺失調MV》、《衝上雲霄主題曲-歲月如歌》

 

 

YOU MAY ALSO LIKE