森美專欄:京都單車旅行

森美

去京都旅行最好嘅月份係3月同11月,3月可以睇櫻花,11月就可以睇紅葉,而且天氣唔會太熱。

仲有,我推介喺呢啲賞花同賞楓時節嚟個單車旅行,只要兩口子都識踩單車,出發前喺香港搵個單車公園操一兩日,就可以踩單車喺京都橫行。喺東面過咗鴨川就係清水寺,再西行去嵐山來回只係20公里,踩單車來回兩個鐘就完成。而且每個景點之間話長唔長,話短唔短,如果行路就費時失事,踩單車嘅話,十零分鐘就到,喺賞楓季節天氣又涼爽,唔會踩到身水身汗。


租單車亦好方便,四周圍都有,網上又有好多台灣人上載資料,你可以揀間最近自己酒店嘅或者喺地鐵站附近租又得。泊車方面,好多寺廟外面都有得免費泊,就算係要收費嘅泊車點,都只係200 Yen就可以泊一日。


唯一要留意嘅係有啲道路唔可以踩單車,不過租單車嘅地方會有地圖,地圖上面就已畫好哂最繁忙嘅祇園同埋購物街道唔踩得,去到你自然會知。


如果真係諗住去踩單車,最好預先問定酒店,因為好多酒店都有單車出租,每日只需1000 Yen。出去行又唔使等車又唔使喺車度同人逼,可以話係最簡單又最舒適嘅遊京都方法!

作者Profile:

DJ、金牌司儀、棟篤笑講者、製作公司老闆、專欄作家,他不放過任何渠道,誓要透過不同身份、不同平台發揮源源創意。

YOU MAY ALSO LIKE