森美專欄:婚姻係一副眼鏡,定係一條鎖鍊?

DJ 森美

同幾個結咗婚嘅男人摸住酒杯底,自不然會講起婚姻係枷鎖,然後就會仰天長歎大問點解!咁樣紓緩壓力對於男人嚟講好重要,因為男人個心天生就好難安穩,一安穩就會想坐過山車搵啲刺激,但係有啲男人連坐過山車都唔敢,因為佢地怕出軌,所以就只能仰天長歎。

同幾個結咗婚嘅男人摸住酒杯底,自不然會講起婚姻係枷鎖 (photo: Shutterstock)


但婚姻到底係咪真係枷鎖呢?其實只係睇你點睇。假設有一日有人同你講,佢可以令你一生幸福,但係你要將一件物件戴喺身上,每日都要戴住,除低一日都唔可以,直到老死,咁你肯唔肯呢?如果你諗住要戴嘅係一條鎖鍊,唔好話一世,一日你都會覺得苦,沖涼放低咗又怕唔記得戴番,想去游水又驚條鎖鍊沉你落大海攞你命,咁你當然耍手擰頭!

如果你諗住要戴嘅係一條鎖鍊,唔好話一世,一日你都會覺得苦 (photo: Shutterstock)


但喺你拒絕之後好奇問究竟嗰樣係乜野,結果原來係一副近視眼鏡,原來嗰樣野你唔單只唔介意戴住佢,甚至冇咗佢你就唔可以正常生活,有佢你先可以生活得有趣味,嗰刻你就會後悔冇選擇到佢!

有佢你先可以生活得有趣味,嗰刻你就會後悔冇選擇到佢 (photo: Shutterstock)


所以婚姻係會一世跟住你,但究竟佢喺你眼中係一副眼鏡,定係一條鎖鍊?可能你唔覺得你另一半咁有用,但就當嗰樣野無咁有用,例如佢只係一條底褲,咁要你著一世都無咩大不了啫。所以唔好再將婚姻妖魔化,下次戴眼鏡或者著底褲時,不妨諗諗你嘅愛人啦!

唔好再將婚姻妖魔化,下次戴眼鏡或者著底褲時,不妨諗諗你嘅愛人啦 (photo: Shutterstock)

photos by Shutterstock

作者Profile:

DJ、金牌司儀、棟篤笑講者、製作公司老闆、專欄作家,他不放過任何渠道,誓要透過不同身份、不同平台發揮源源創意。

YOU MAY ALSO LIKE