森美專欄:失戀時你會做啲咩?

DJ 森美

失戀時你會做啲咩?唔同人有唔同做法,但通常被飛一方自我價值都會跌到好低,呢個時候,有啲人會好積極,會猛做運動或者四圍去學新野,既增值自己又可以分散注意力;另外有啲人就會消極逃避,借酒消愁或者化悲憤為食量,希望可以喺近乎自殘嘅情況下忘記傷痛。

 

不過,仲有一種做法我唔肯定係屬於邊類型,嗰種做法就係搵水泡。失戀最快嘅治療方法就係搵個新目標,有新人喺身邊自然就可以將舊人忘記得一乾二淨,但呢種究竟係積極定消極嘅方法呢?

如果你可以搵到一個能夠令你忘記情傷,而你又真係鍾意佢,可以成為你嘅perfect match,咁當然看似積極。但叫得做水泡,明顯就唔會係長遠兼穩陣,結果都係短暫居多。最慘嘅係身為水泡嘅唔知自己只係你短暫治療嘅自救工具,到你上岸嘅時候將佢拋棄,咁你自然就傷害到人!

無論呢個方法係積極定消極,你嘅水泡都冇必要接受呢種風險。所以,喺你唔清楚自己想點以及唔應該傷害其他人嘅道德考慮之下,我勸你都係盡量唔好搵水泡,因為咁係唔合符道德嘅做法!

作者Profile:

DJ、金牌司儀、棟篤笑講者、製作公司老闆、專欄作家,他不放過任何渠道,誓要透過不同身份、不同平台發揮源源創意。

 

YOU MAY ALSO LIKE