《幕後玩家》爆肌男神!張繼聰金句大檢閱

JK Morning

無綫熱播劇《幕後玩家》開播不久已成功引起全城熱話,當中最搶 focus 的一定是飾演 Tim 少的張繼聰。張繼聰這次演繹轉數快、把口啷過油、能言善辯的花弗男,劇中句句金句,時而幽默抵死,時而少少鹹多多趣,一時mean精賤咀,一時係一個溝唔到女嘅可憐蟲,妙語連珠精警語句一籮籮,觀眾大讚笑爆咀,難怪連太太謝安琪也黐實電視捧場,連食飯時間也順應調了,做一個忠實fans咁話。即睇以下啜核過癮金句,不妨袋返幾句傍下身。

 



Tim 少覺得愛情是.... 

拍拖時實有拗撬磨擦,張繼聰說的:「一咀解千愁,一攬泯恩仇」可以大派用場!這句話道出人都係受軟唔受硬,兩個人在一起,不過是你就下我,我就下你,氹下氹下又一日。

 


「你當人乾柴烈火,人當你乾炒牛河。」話說張繼聰帶爸爸去尋找離家出走多年的媽媽,爸爸心繫老伴,張繼聰替他不值,爆出這句。唉,愛情呀,就是充滿不平等條約。毒舌中見真理。



「做嘢退一步海闊天空,愛情退一步人去樓空」愛情就是要把握時機和機會,不爭取的話,過咗去,甚麼都沒有了。


單身可憐蟲 
張繼聰在劇中,鬼馬搞笑,口甜舌滑,不時口花花冧女仔,可惜的是,其實係一個「溝唔到女嘅可憐蟲」。難怪自己都爆:「從不喜歡孤單一個,可惜偏偏孤獨一個。」係慘啲嘅....



仲有句「我想鴛鴦戲水就浸死,比翼雙飛就撻死」完全將獨男的無奈心聲發揮至極致。 

金句之外,他在酒吧自彈自唱:「I'm lonely, I'm lonely in Kowloon City,I'm so lonely,I need girl」這首歌原來是張繼聰在片場親自作的,超有才華!歌詞亦唱出寂寞單身人士的感受,揪心又應景。


女仔梗係想要人氹架啦 
故事講述新來的同事劉佩玥被公司其他人屈,令劉佩玥大感委屈,張繼聰搞笑說:「單憑你樣靚就夠治你罪啦!」比起一句「唔好唔開心啦」,這種風趣式安慰,女人一定受啦! 

在劇中,張繼聰把口啷過油,就算對住馬蹄露也不例外,當馬蹄露險濁親時,「你條命咁矜貴,畀魚子醬濁親就話啫,畀菠蘿喎,我心痛架嘛」誰人遇意外,聽到句咁嘅嘢,都笑返啦。 

對事業的理解 
「公關只有一個字忍,你有冇見過舞小姐會鬧客人?鬧咗就冇錢賺啦!」兩三句道出做公關的秘訣。講真,天下間好多工都要忍,忍上司、忍客戶,百忍成金呀。 

張繼聰在劇中雖玩世不恭,但工作絕對認真,是 Work Hard Play Hard 的典範。他教劉佩玥做事,劉佩玥寫「千里條條」,張繼聰說:「千里迢迢呀,「紹紹」,女就一條條」女神有錯,Tim 少也不會「姑息」呀。



人生這回事


「啲人話錢係萬惡,咪又係個個都搵;啲人話女人紅顏禍水,咪又係個個都滾!」嘩,世事都被你看透!人呀,就是貪得無厭。 

「返得學多,讀得書少!」簡直是不少人的心聲,我都唔知返學學咗啲咩。



張繼聰寸女士「喬裝」:「唔係猛龍唔過江,唔係豬扒唔化妝!」押韻抵死。係就係mean 啲,但網友都大讚這樣的男士可愛風趣喎! 


延伸閱讀:那些《幕後玩家》沒有告訴你的關公辛酸

真心為你好! 謝安琪'溫馨'阻張繼聰打波

 

YOU MAY ALSO LIKE