藍橘子專欄 :同女友性格不合,但可以愛一輩子嘅方法

藍橘子

最近同女朋友傾開一樣每對情侶都會講嘅話題。
就係『當初點解會鍾意我?』
 
雖然係真心話,但我梗係唔會講「因為妳靚」咁膚淺啦。
於是,我同佢由興趣開始講起、再講鍾意嘅顏色、鍾意食乜、鍾意冬天定夏天…...


 
我先發現,原來我同女朋友完全唔夾。
根本唔係天生一對…
 
就連性格都截然不同,女朋友鍾意預先計劃好一切,避免任何意外發生。
 
我個人比較懶,係Deadline戰士,永遠拖到最後一刻先做,去旅行唔鍾意計劃行程,去到邊玩到邊。
 
「死啦…我哋係咪唔夾啊…」女朋友有啲擔心。
「點會呢,性格一個凹、一個凸先係最襯啊!兩個一樣性格嘅人最唔適合一齊!」。


 
「點解?」
「妳諗吓,如果有兩個妳,妳咁鍾意講嘢,我又鍾意講嘢,幾嘈啊!再加上…兩個都鍾意講,咁邊個負責聽?」
 
其實兩個人,除咗唔使性格一樣,鍾意嘅嘢,觀念與角度都唔需要一樣。


 
亦唔需要強逼對方改變,喜歡一個人嘅相處方式,最重要係識得互相欣賞同體諒。
 
女朋友有咩事發生,我永遠企喺佢嗰邊。
無論開心或唔開心都好,只要肯同我講,我都一定喺佢身邊。


 
情侶之間鬧交少不免,更何況係性格完全不合嘅兩個人?!
所以,我同女朋友一定會事先講明…
 
「妳記住啊,有咩不滿,一定要同我講,唔准屈喺心入面。」
「乜你好鍾意鬧交咩?」
「雖然每次鬧交都係妳贏,但相比起鬧交,我更加唔想妳心入面有條刺。」


 
與其想盡方法避開罵戰,倒不如將自己想法如實講出嚟。千祈唔好有「犧牲自己」嚟遷就對方嘅諗法。
 
『我忍咗你好耐啦!不過無出聲話你咋!』
呢句鬧交經典對白,試問對方要可以點擋呢?


 
一個根本唔知道自己做錯嘅人,你突然間鬧佢做錯,仲要係「忍咗好耐」,又點服氣向你認錯吖?~
 
所以,唔好以為忍一時可以風平浪靜,心入面條刺可以插入一世嗎?
或許今日只係一小根刺,但過一段日子之後,呢條刺有可能會成為鬧大交,甚至係分手嘅導火線。

 延伸閱讀:興奮到一個點﹗由朝到晚自製性欲快感

延伸閱讀:王貽興專欄:她不過是綠茶婊

YOU MAY ALSO LIKE