過時過節，有心儀對象的你可能正心大心細，想約佢陪你過個浪漫之夜，讓曖昧已久的關係明朗化……如果你真係咁諗，勸你要認真三思！年中唔少絲士打就係衰喺呢啲關鍵日子，二人明愛暗戀得如火如荼，豈知對方忽然冇來電邀約，就算你主動出擊，卻換來冷淡對待。唔想佳節成為你嘅陰影，應先了解男人為何臨時轉呔，戀人未滿未必無因。

原因：以為你冇興趣

十個有十個專家指，男人忽然唔再發動追求攻勢，原因係佢以為你對自己冇興趣。呢種情況多數出現喺高姿態地扮上菜嘅女士們身上。她們明白保持距離係黃金法則之一，讓男人採取主動、唔好接聽佢所有來電冇錯係一眾date doctors嘅建議，但錯在保持too much嘅距離，就連一次主動聯絡對方都冇，男人又點知你對自己有冇興趣，與其表錯情，不如轉攻更有把握嘅對象。

建議：就連專家都好難確定幾時係女人採取主動嘅最佳時機，但一般而言，如果對方已經幾日冇搵你，你不妨主動打電話（或短訊）關心一下佢嘅近況，但切忌一開聲就問：「你仲乜唔搵我呀？」此乃死罪！當男人被質問時，佢對你嘅興趣會瞬間大減；也不宜主動約會佢，佢或者真係工作纏身，又或因一些未必關你事嘅原因而冇搵你，你應保持耐性，只有佢自己先知幾時最適宜約會。

另一重點，採用心理學理論positive reinforcement。當佢為你付出或表示關懷時，你應給予鼓勵，溫柔的說句「謝謝」、一個輕吻、簡單的為他按摩勞累的肩頸，甚示是一份驚喜小禮物等，也能讓他感受你嘅愛意。

原因：你太纏身

由遠古時代開始，男人就係捕獵者，享受過程嘅刺激及成功感。女人視密集嘅主動關懷為幸福、興奮，可惜男人卻視之為責任、纏身。每當男人感覺到你比他更早考慮發展長久關係，你愛他比他愛你更深，佢會很快對你失去興趣。你嘅主動邀約或瘋狂來電，只會破壞你喺佢心目中渴望得到、十分吃香嘅印象；更壞嘅情況，係佢認定你會十分纏身、依賴，對將來發展長久關係未必有好處，於是決定中途落車。

建議：女人只需要快樂地做自己，安份地做個女人──讓他「追」你吧！每個男人都喜歡追求及挑戰，所以你嘅奪命追魂call（或短訊）只會使他疏遠你。你不宜太爽快答應邀約，更不應隨傳隨到，這只會令男人覺得追你冇難度。你應對他表明你有能力使自己生活得快樂自在，而非一日到黑好似怨婦咁等佢擺佈你嘅人生。切記，男人認為充滿自信及自主嘅女人特別有吸引力。

原因：他有感情包袱

專家話男人其實同女人一樣係感情複雜嘅生物。男人會投入地愛上一個女人，但礙於呢種感覺會令佢自覺依賴、是個懦弱小男人，往往需要較長時間去克服呢種心態；也有一些男人因為有過痛苦嘅失戀經歷，心裡從此築起防護牆，在埋門一腳尤其聖誕、情人節呢啲關鍵時機，由於唔知點處理複雜嘅情緒，索性選擇逃避，不再主動邀約甚至唔聽你電話。

建議：給他安全感

外國著名男性網站AskMen.com早前發表調查報告，指男人決定跟心儀對象發展長久關係，第二大考慮係對方能否給他關愛及潤澤心靈嘅安全感。你無須變成佢阿媽照顧佢嘅起居，唔駛朝朝打電話叫佢起身，亦唔需要殷勤到買早餐等佢，只需喺佢需要你嘅時候出現，認真聆聽佢嘅煩惱，但切忌社工上身為佢獻計，留番個空間畀佢自己解決問題，保留作為大男人解決問題嘅勇氣及能力。

原因：佢唔鍾意你

成日有人話男人粗心大意，其實男人嘅小心眼不比女人的弱。約會過程中，佢發現你其實唔係最愛，原因多不勝數，可能係性格不合、價值觀有分歧等等，作為女人既冇可能完全滿足男人嘅需要，亦冇能力控制佢嘅想法。佢唔再主動約你，故意凋淡曖昧關係，表示佢可能想離場。

建議：不要糾纏

每個女人都值得被一個真正喜歡自己嘅男人寵愛，無須與一個唔愛自己嘅男人苦苦糾纏，更不應自暴自棄。希望在明天，你大可放開眼界，打開心窗，繼續使自己嘅外表及內心也漂漂亮亮，為真命天子作好準備吧！