不想有異味飄出來！5個方法助你趕走體臭

夏天又嚟喇，身體容易出汗，有時難免俾啲異味（體臭）走咗出嚟，為免尷尬，就要盡量做好防味操施！

1. 定期除毛：

冬天我哋可能會疏懶啲，但係夏天就唔可以喇，定期適當修剪腋下毛或特別多毛髮嘅部位，咁就無咁易俾細菌滋生。沖涼時記得要抹乾呢啲位，臨瞓搽止汗劑。

2. 著通爽質地嘅衫：

盡量揀天然纖維物料嘅衣物，唔好太緊身焗住成身汗，俾皮膚足夠嘅唞氣空間。

3. 注意鞋襪：

鞋襪最易儲住啲異味，唔係著住都會自己散發出異味出嚟！所以要定期檢查下有無怪味，有就洗洗佢，消毒下，攞去曬下；如果本身屬於大汗腳，平時最好帶多對襪喺需要時更換。

4. 注意體重：

某啲位肥胖嘅話，會好似BB仔咁，有啲位置形成摺埋嘅情況，沖涼時記得清潔呢啲位，抹乾，保持乾爽。另外適當減重對處理體臭同個人健康都係有益嘅。

5. 用吸汗護墊：

坊間有呢種產品賣，雖然幫唔到減少汗水，但可以護住你件衫，唔使俾人見到件衫腋下個位出現兩撻濕咗嘅陰影；而且你可以隨時入洗手間更換，保持乾爽。

*除咗腋下、大腿內側呢啲位，女生下面喺夏天都有可能因為出汗而多咗啲味，改善方法都係差唔多，多著棉質內褲、保持乾爽、適當除毛，經期嚟時換護墊換得頻密啲，有其他問題就當然要睇醫生啦。