認定對方先好嫁！

女人，全宇宙最矛盾嘅動物，認定對方係Mr.Right，但成日想結又怕分，最擔心嘅係婚後先發現原來心目中嘅好老公同心目中嘅有出入。唔想後悔，最好喺婚前同佢一齊做以下8件事，可以幫你睇清呢個身邊人！

1. 嗌交時睇清對方

情侶嗌交唔止係情趣，仲係大好機會俾你了解佢嘅理性程度、思考模式同溝通方式。就當作一個婚前預覽，起碼知道婚後佢同你爭執時會採取咩態度，逃避定係共同面對？

2.  共同分擔責任

女人最怕嫁咗個大懶蟲，所以最好同佢一齊分擔日常家務甚至旅行行程，佢唔記得就俾個溫馨提示，呢啲事最好婚前就搞清楚，結咗婚先「抝數」就無謂啦!

3.  財政要有共識

講錢傷感情？假嘅！尤其是婚後一大堆共同開支，所以最好喺婚前達成共識，有錢一齊使，亦要一齊儲，一於同佢做返個適合二人嘅周全財政計劃係。

4. 有嘢就要問

咩都放喺心，到婚後就會變成影響感情嘅問題。趁早將你覺得好重要嘅事情好似使錢習慣、家庭狀況拎出嚟傾，可以對佢內內外外更深入了解，了解大家，連信心都返晒嚟。

5. 空間共享

結婚之後就要一齊住，亦即係話要共同生活同享用同一個空間。不妨在婚前試試跟對方享用同一個空間，仲可以順便了解一下對方嘅生活習慣。

6. 一齊定下共同目標

要同佢過埋下半世人喎，共同方向好重要。試試同佢一齊訂立人生目標或夢想，可能啱啱開始唔夠一致，但起碼仲有時間俾雙方慢慢作出協調。

7. 從旅行中學習

去旅行係拍拖必備節目，但其實仲可以令雙方學習協調、共同計劃旅程。更重要係旅程中大家都會真情流露，可以趁機學吓點樣接受對方最差嘅一面。

8. Cooking Together

一句講晒，兩個人玩煮飯仔，過程需要協調同互相學習，每次可以相安無事收場，證明你哋已經甚有默契。

延伸閱讀＞＞「我哋都係做返朋友先！」點解男人分手都要咁講？

延伸閱讀＞＞7種解讀！睇清男人心