而且婚禮是女人的天下，留多啲空間俾女生發揮做決定，有何不好？其實男生最重視的未必係婚禮當日，而係求婚成功日。如果你未婚夫叫做肯幫手搞下婚禮，你已經好幸運！
2. 明明已經籌備緊婚禮，但點解男人都仲未求婚？
籌備婚禮呢個動作，已經隱含咗「會結婚」，所以有男人會覺得「求婚」呢個儀式可以直接skip。好多女生好重視求婚，但對唔住，部分男生會覺得只係行禮如儀。冇十足把握，都未必會求；況且都搞緊婚禮啦，咁做咩仲要搞多壇「大龍鳳」？
不過，如果你真係好在乎求婚，一定要表態，明示、暗示下另一半，聰明的男人自會識做。
3. 問親男人邊件婚紗好、婚禮用咩顏色做主色、要有咩佈置都話「你鍾意」， 好求其...
男人普遍對審美、顏色的判斷比較弱，天生的，冇得搞。如果男生唔係從事設計、Marketing、PR或者美術相關的工作，基本上男生了解世間事物的色板，頂盡都只有彩虹七色。求下你，唔好嘗試去問未婚夫「你鍾意玫瑰紅定係橙紅？」之類的問題。
4. 我同奶奶為咗婚禮Seating Plan吵大獲，點解佢都可以粒聲唔出？
正常嚟講，老婆同老媽子都係一個男人一生中最重要的女人，一世都要對住呢兩個人，幫邊個都死;再者，講多次，婚禮安排冇對與錯，咁不如索性收嘴。就好似哥斯拉同基多拉大戰，渺小的人類只可以用逃避嚟減少傷亡。
5. 婚禮任何事都係我準備，點解就連男家應該準備的婚事都係我搞？
嗯，承上，對男人而言，求婚成功後，已經算完成任務。而且男生普遍好怕麻煩，又過大禮又擺酒又Party之類，女生可能覺得好好玩可以發揮小宇宙，男生普遍只會黑人問號。
即使你未來老公搞婚禮時係軟皮蛇，都不代表他是個不負責任的男人。比啲信心你老公，亦都比啲信心自己。普遍男人只係覺得婚禮好麻煩，有好多step可免則免，用最少effort處理到件事就最理想。對婚禮的態度，未必反映男人的生活態度。捱過呢一關，新的婚姻生活就在眼前！
