明明已經畢咗業，點解無啦啦發夢返學校考試？

每個學生返學嗰陣，最驚就係考試！或者你都試過，明明自己畢咗業，無啦啦夢見自己準備考試，夢中仲好可能係毫無準備：冇溫書、冇帶准考證，甚至連考邊科都唔知！瞓醒嚇餐死之餘，仲有成頭「黑人問號」，心裡問：「咩事呀？」

Amy夢見自己坐喺以前中學嘅禮堂，感覺自己考緊數學 (Amy最唔擅長嘅一科)，面對密密麻麻嘅試題，因為冇溫過書所以腦袋一片空白，四周圍望吓，大家都係埋頭苦幹，寫寫寫，一種驚恐又緊張嘅感覺立即冒起，心諗：「今次死喇！」正當Amy想落筆之際，校鐘響起，而最後佢發現原來係鬧鐘響，夠鐘起身。

已經出嚟做嘢好幾年嘅Amy，發考試夢全因為最近接手跟一個新project， 上司希望Amy參考過去類似嘅project，然後做個budget plan。而一向唔擅長圖表同計數Amy為咗表現自己就唯有頂硬上，於是內心就產生巨大心理壓力。

考試，除咗代表受到評核，也少不免涉及競爭，雖然我哋已經離開讀書考試嘅日子，但一個個工作上甚至生活中嘅挑戰其實同考試一樣，係一個測試自己有幾多斤兩嘅好機會。其實考試並不可怕，出現考試夢就係一個好嘅提醒，話你知你驚啲咩、擔心啲咩，然後問自己「我有冇能力衝過去？」，如果覺得自己準備不足就對症下藥，好好裝備自己。

想自己有進步並唔應該只係由做到咩職位、搵幾多錢去界定，若果你能夠帶住戰戰競競嘅心情去面對挑戰，驚都肯做，先至係你成長同突破自己嘅最好方法。

＊假如你都想解夢，歡迎e-mail到 editorial@cosmogirl.com.hk（Subject: CG! 解夢），由解夢分析師幫助大家。

－－－－－－－－－－

Peggy Suitcase，解夢分析師、註冊催眠治療師。喜歡探索夢境意義，從中領悟出生活小智慧

Facebook: Peggy Suitcase