棉花糖女生Way從小到大都是一名肥妹仔，10歲左右體重已非常驚人，重逾80kg，人生體重高峰期更是剛大學畢業的黃金時期，急升至近118kg。今年26歲的她，兩年前終下定決心減肥，而原因居然不是想變靚，而是「唔想再因為身材而令人生有遺憾」。
登入 瀏覽本網站，可獲取積分換領專屬優惠
點擊查看專屬優惠
Way自小被稱「豬扒」遭侮辱 同學、陌生人屢白眼對待
5XL超大碼身形不但影響健康，更令Way覺得自己不值得被愛及被善待。 她指自小被稱做「死肥婆」、「豬扒」等，再難聽、再侮辱的暱稱都有。求學時期，Way更屢受同輩欺凌：「放小息經過走廊，班男仔見到我話會開始大笑，話地震啦！去到大學O camp 玩first impression，我被所有男仔認為係呢世都嫁唔出，要做老姑婆嘅人。佢哋玩true or dare，輸左嘅就要過黎問我拎電話。」
擁有棉花糖身形的Way，以往買衫買開5XL 的尺碼，平日買衫經常受sales 白眼，一入店舖便遭到不友善的眼光打量全身，更會話「你會撐爆件衫」而拒絕讓她試身。即使在街上，Way亦會面對陌生人的抨擊：「試過搭電梯時，我一入去，啲人笑住問會唔會墮；又試過俾鄰居問我著咩碼嘅衫、食咩可以食到咁大份。」-
過去十數年，Way 的自信及自尊心都跌到低點，不但思想悲觀，更加討厭自己到曾經自殘，手上留下不少自殘的痕跡。甚至有自殺傾向。
減肥非因旁人批評，只因為不想錯過太多精彩人生
縱然被他人指指點點，並未立即激發Way 減肥的決心，反而因年前身體健康出現問題，令她逐漸醒覺：「我行路開始膝頭哥痛，心口都會痛，覺得自己有種就嚟死嘅感覺，所以決定減肥。」
同時，她翻看舊照，驚覺自己的背影如米芝蓮般，一層層肥肉甚為誇張，感到從未見過真正的自己。「那時我開始醒覺，因為肥而錯過了很多精彩時刻。好似中學謝師宴時，太肥買唔到靚衫，所以無參加；去土耳其旅行，因為太重玩唔到滑翔傘等。」Way決定，要好好把握人生每個機會。
開IG帳號公開黑歷史及減肥過程 獲大量網民DM留言
人人都有黑歷史，Way的黑歷史正正是暴脹的身材。 對她而言，肥妹仔是她人生不可忽視嘅經歷，她希望透過記錄方式，見證進步：「當你有氣餒想放棄嘅時候，睇返自己以前做過咁多嘢、睇返啲對比圖，係好有動力繼續做落去。」
因為肥胖，她的自信大受打擊，難道她不怕因公開肥妹仔黑歷史而再度受傷害嗎？她說：「其實都我想試吓透過公開自己不堪入目嘅過去，去令自己更加勇敢去面對外界同陌生人，改變內向的性格。」不過事與願違，Way 經營IG 兩年，粉絲近5,000人，卻從未收到haters 的批評或侮辱：「我喺呢個IG見證到人性嘅善良同光輝，每一個留言都好正面。啲網民成日話我好勵志，好激勵到佢哋去減肥。但當我唔開心氣餒嘅時候，佢哋會鼓勵返我。」
曾夢想2年減120磅 後發現體形比體重更為重要
Way 一開由搵營養師幫手，針對問題所在擬定營養餐單：「佢哋會話俾你聽每日可以食幾多卡路里、幾多gram嘅肉、碳水化合物等等，我自己再根據返quota去設計食譜。我只靠飲食就減去90磅，方法就是少鹽、少油、走糖。但我覺得身形唔太好睇，啲肉比較鬆唔夠firm，加上行幾層樓梯就喘氣，覺得自己體能好差。所以就開始去做gym。」
「以前冇做運動就淨係睇體重做人，以為體重輕咗就代表瘦咗。但開始做運動後，因為增肌關係，有時體重上升可能係因為肌肉多咗。」明白了這道理，Way 就知道體態比體重更加重要：「本身諗住減到去理想嘅BMI，即係合乎世俗嘅眼光（以BMI計算，她的標準身形為58 kg）。依家我希望慢慢練返好啲線條，可以有健康陽光嘅感覺。」
「地獄式減肥法」 變「天堂式減肥法」 Way：減肥減得好開心
「以前未認真開始減肥之前，會覺得減肥係一件天方夜譚嘅事。曾以為淨係食烚菜、烚雞胸、飲奶昔再去跑半個鐘步就減到肥，結果食咗一次就驚咗。但其實最主要係要食得啱而唔係食得少。」
Way 分享指：「減肥七成靠飲食；三成靠運動。一開始可以試吓少啲出街食、試吓自己帶飯、戒有糖嘅飲品、盡量唔食煎炸野。」運動方面，她每星期會做5日運動，跟教練編製的健身行程操練不同部位。為了兼顧正職、副業，又要準備健康飯盒，Way 每日凌晨5am就會起床做gym，再回家屋沖涼、煮飯，準備上班，毅力十足！
減肥目標成功了一大半，Way 也會利用cheat day 好好獎勵自己，但一年最多只有4-5次，大多訂在大時大節：「我每次cheat day都真係會放開肚皮，有咩想食都會去食哂！試過2日食超過10,000kcal ----炸大腸，薯片、pizza........我覺得cheat得就唔好有罪惡感，要做定增磅嘅心理準備，好好去享受美食！ 」
減肥重拾健康及自信 Way：「自信唔係因為外表好睇咗！」
Way：「以前嘅我係真係好懶惰又完全唔注重健康，每日雪糕、薯片不離手。但係喺減肥嘅過程中，我慢慢培養咗健康飲食同運動嘅習慣，明白you are what you eat。當你善待身體嘅時候，身體都會有正面嘅改變，例如皮膚好咗，人都精神咗。」
體重激減90磅，能在連鎖時裝店買到S 尺碼衣服，Way 開心地表示生活上帶來很多微細的轉變：「例如望住以前唔啱着嘅衫，到慢慢啱着，之後仲要鬆身到唔啱著；搭車唔洗坐1.5個位；可以去連鎖時裝店買衫、唔洗買最大碼衫、可以蹺腳坐、唔會再好似以前咁怕熱同出汗....」Way 開心地說：「終於可以好好享受生活。」
除了健康及生活上的改變，Way 亦重拾失去已久的自信：「呢種自信來源唔係因為外表好睇咗，而係發覺只要下定決心去做一件事時，只要你相信自己做到，你就真係會做到。」相信自己，便是自信的表現！
以生命影響生命 開Telegram 分享食譜及交流減肥心得
除了經營IG外，Way 亦受到粉絲鼓勵，開Telegram 與大家分享減肥、做gym心得、食譜等：「一班有共同目標嘅人分享返自己嘅減肥經歷，就好似有一大班朋友陪住你減肥咁，唔會覺得孤單寂寞。」
Way 強調，減肥是一種長期的抗爭，需要無比耐性及時間：「呢個世界冇一種減肥方法係適合所有人，你要喺減肥過程裏面慢慢去發掘專屬於你自己嘅減肥方法。唔好盲目追隨人哋嘅步伐，亦唔好為咗快而去唔好嘅減肥方法，最緊要唔好將自己同人哋去比較。」
立即訂閱接收Cosmo最新潮流資訊
訂閱電子報，緊貼流行健康飲食及生活！