港姐:跟偷食老手乾脆地分手吧!

By COSMO

出軌, 期騙感情, 偷食, 愛情信箱, 港姐

CG:

你好,我同我男朋友K一齊咗三個月,我哋嘅故事有啲長,所以真係要麻煩晒你俾少少耐性睇晒佢。

我喺美國讀書,K喺上年十一月就啱啱好喺澳洲讀完,今年四月再返去行禮。而我同佢喺舊年暑假返香港一個朋友I嘅生日會到識嘅,一直都冇聯絡直至八月佢叫我喺美國幫佢買啲嘢,我哋就開始日日傾計,到九月我地仲開始日日skype。當時個生日會其實係我女仔朋友L叫我去嘅,後來L就同我講K呢個人講嘢信一成就好,K把口好叻好識氹人,叫我千祈唔好上當。我開頭都係抱住同佢做朋友嘅心態同佢傾,即使佢成日同我傾計都加好多啜嘴心心emoji,做到好明顯係對我有意思,一直都對佢有戒心。直至同佢越嚟越好傾,佢提出話要嚟美國揾我,我見佢當時每日都會花好多時間同我skype,又會間唔中寄禮物氹我開心,我又開始對佢有好感然後就應承俾佢嚟。

K未同我一齊嘅時候,佢有同我講過以前拍咁多次拖都係同啲女仔順其自然咁一齊,從來都唔同人表白。我就同佢講覺得咁樣唔好,一定要搞得清清楚楚,容乜易「口趙」完鬆。嚟到美國第二日佢就想錫我,我就同佢講我哋未係男女朋友唔可以咁,迫佢開口表白,然後佢就問我可唔可以做佢女朋友。其實佢喺美國嗰一個月好照顧我,所有事都好就我,仲好錫我,甚至佢上個月返咗香港都會好關心我日日同我skype,仲同屋企人去旅行見到我鐘意嘅嘢都會買定俾我俾surprise我,我見佢對我咁好我就好天真咁諗會唔會係佢拍咗拖就對女朋友好好。

出軌, 期騙感情, 偷食, 愛情信箱, 港姐

直至前幾日我喺個朋友嘅WhatsApp group入面傾計,傾傾下我個friend突然爆響口話:「L話你男朋友喺上兩個星期去澳門嗰時 ( 男朋友話去澳門係揾婆婆拜年,佢有影埋相俾我睇 ), 問喺澳門嘅一個澳洲舊女同學一唔一齊喎。」我睇到當下即刻揾L求證,因為L嘅情報係絶對可靠,結果我男朋友真係背住我問其他女仔同唔同佢喺埋一齊。我知道咗之後,我竟然一啲想喊嘅意欲都冇,成個腦淨係諗住點同佢講分手嘅,同時又可以俾全世界知佢係一個賤人。

四月一號我就讀完晒書返香港,於是我諗住唔好即刻篤爆佢住,喺香港繼續同佢扮到好恩愛咁,佢呢啲老江湖偷食開有條路,一定好多方法掩飾,但我相信如果佢係慣犯佢一定會有蛛絲馬跡留低,然後一次過用佢Instagram account post晒啲罪證上網同用direct message send 晒俾佢所有識得嘅人。不過我諗諗下唔對路,因為我懷疑我有啲不雅照片喺佢手上 ( 之前同佢skype嗰陣兩個人都情到濃時……唔知佢有冇 cap圖 ) ,所以我一定要用一個温和嘅分手方法,千祈唔可以刺激到佢,但又想同時話佢知我知道佢偷食,唉對唔住,我而家心情真係好複雜同矛盾。

我覺我男朋友真係好恐怖,點解可以做到講大話面不改容?到今日都係可以句句話「bb我好掛住你」、「好想你快啲返嚟」,又喺Instagram到upload相又tag晒我,另一邊就喺到叫其他女仔同佢一齊。仲有即使我知道關於佢以前嘅衰嘢係真嘅,佢都會死口唔認,我仲發覺佢有好多嘢瞞住我。佢表面功夫做得真係好好架,佢本身四月五至十九號飛返澳洲行畢業典禮,佢仲為咗見多我十日改機票延遲到十五先飛去澳洲。

多謝你花時間睇晒我打嘅嘢,正所謂「一次不忠,百次不用」,我而家真係好煩惱要用咩分手方法先係最好。我想做啲佢好討厭嘅事迫佢同我講分手,等佢做醜人又唔怕刺激到佢,定係應該我求其諗個藉口同佢講分手?

Samantha

出軌, 期騙感情, 偷食, 愛情信箱, 港姐

Dear Samatha,

不用FF太多了,這種老手才不會為了你跟他分手而受甚麼刺激。你跟他分手,他立馬就轉頭去找別的女人了,又或者根本從頭到尾都不止跟你一個在一起。

像你所講,切忌去得太盡公開揭穿他令自己有任何危險。其實分手就分手,亦無需要讓他知道你已知道他做過的事。根本不應浪費這樣的時間及心機去搞這麼多。

隨便找一個無聊、細微、老土的原因平平和和地講分手都可以,因為這樣的人根本不會在乎。他巴不得快點去找下一個呢!

港姐

港姐,一名八十後港女人格分裂而出現的角色,深信無論男女,人人心中都有一個開不了口的港女。虛構但真實、嘴賤但心軟。是悲觀的樂觀主義者、現實的浪漫主義者。不懂花言巧語,只知實話實說。
 
 

**如果你遇到任何愛情上的疑難,都歡迎e-mail到editorial@cosmogirl.com.hk(Subject: ask CG!),愛情專家團隊會於CosomGIRL!為你解答!

LOAD MORE