3招塑造健康美甲!

by lulu T. & Karen C.

手部護理, 指甲保養

潮流興裸妝,如果指甲油得太鮮艷,成個look就唔襯。但係平時慣了密密搽甲油,突然要「裸甲」,即使塗上護甲光油,也難掩變黃又粗糙的指甲。所以,平日一定唔可以忽視指甲護理,同日常護膚一樣,保養得好,隨時裸妝、裸甲都無問題啦!

1. 甲油花咗,補搽好過全部抹掉

好多人都誤會咗,以為指甲變黃,係因為指甲經常被甲油覆蓋無法呼吸所致。所以好多人搽指甲油時花咗,寧願全部抹掉,俾指甲「透透氣」,第日再搽過。事實上,指甲係一種由蛋白質、角質素、維生素、礦物質所組成嘅角質組織,同頭髮一樣,表面無氣孔,無新陳代謝嘅功能,亦唔需要呼吸「新鮮空氣」。指甲之所以變黃、易斷,主要因為角質結構被外來嘅物質破壞。

洗甲水多數含有丙酮(acetone),呢種化學物質非常傷害指甲,一星期內唔可以使用多過兩次,所以指甲油花咗或甩咗,最好都係用補搽嘅方法。最近喺網上都睇到唔少短片教人點樣將花咗嘅指甲,喺表面塗塗補補,變成其他花款,只要用少少智慧同心思,就可以慳時間又保護到指甲。

當然,除咗洗甲水會傷害指甲外,指甲油嘅色素亦會沉積到指甲上,令指甲變黃,所以搽指甲油之前記得搽上護甲底油。

手部護理, 指甲保養

2. 幫指甲做SPA,改善脆弱問題

好多女仔天生指甲又薄又軟,為咗唔好咁易斷而「被迫」搽指甲,令指甲變得較硬。其實有一個簡單又便宜嘅指甲SPA DIY,只要連續做一個月,就可以解決問題。

方法:只要每日將手指甲浸泡在特級橄欖油中10至15分鐘,就可以有效強化受損、脆弱或容易斷裂嘅指甲。橄欖油可以改善指甲乾燥、脆弱等問題,並且可以滋潤及強韌指甲,同時還能軟化指甲周圍的皮膚。一個月之後,可以改為每兩個星期浸泡一次,keep住護理。

在日常飲食中,多吸收富含維他命H的食物,如肝臟、雞蛋、穀物、西蘭花和牛油果等等,可以強健指甲,使指甲更厚。

手部護理, 指甲保養

3. 剪指甲要細心

講到護甲,不少人都會話用指甲鉗剪指甲會傷甲,建議用指甲銼慢慢銼平指甲及修形。講真,道理是真的,但實際邊有咁多時間呢?如果真係無時間,或者唔識用指甲銼,其實用返指甲鉗都無問題的,只要注意一下剪嘅方法就ok。一般人剪指甲,每片指甲多數都係剪三下,正中、左及右各剪一下,不過咁樣好易將指甲剪得太短,甲形又唔靚,甚至將指頭尖上的嫩肉都露埋出來,絕對係大忌。

剪指甲嘅注意事項:

1. 基於衛生問題,應該用自己嘅專屬指甲鉗,避免同其他人共用,以免互相感染。

2. 剪指甲前,應將手指沖洗乾淨,以免喺剪指甲過程中,受外來細菌感染。

3. 剪甲前最好先泡溫水約5至6分鐘,待指甲軟化較好剪。

4. 一片指甲應分多次慢慢修剪,避免一刀到位,以免容易誤剪,或剪到甲床。剪指甲時,每片指甲由左至右(或由右至左,視乎手勢)至少要剪6-8次。

5. 指甲最好留出1毫米左右,尤其是指甲兩側,唔好剪得太短、太深,以防引起指甲炎症。

LOAD MORE