獨居實用tips!一個人住7件事

by Text: juju

獨居, 生活, 自己住,一個人住

一個人住係有種「無王管」嘅自由嘅,不過就要預咗無人會幫你「執手尾」、「補鑊」,有啲「家居意外」係有可能發生架,到時自己一個解決唔到,向天花板咆哮都無用,醒目女生一定要有預防同應變策略!

1. 後備鎖匙:

將一套後備鎖匙放喺信任嘅朋友度,如果佢住喺同區就最good,唔記得帶鎖匙、倒垃圾時唔小心閂埋咗度自動上鎖嘅大門......呢啲都係時有發生嘅事。

獨居, 生活, 自己住,一個人住

2. 適度補給:

去超級市場入貨時,好容易一時忘形買多咗,搞到自己一個女生要死頂搬20幾磅嘢返屋企,一路搬一路後悔。最好帶定一個大小適中嘅購物袋,補給品裝滿咗就停止入貨。

3. 用繩線幫手拉拉錬:

反手拉連身裙背後嘅拉錬,有時係一個高難度動作,不妨事先喺拉錬頭縛上一條韌度高嘅線,拉上拉落時拉住條線會容易啲

獨居, 生活, 自己住,一個人住,貼士,實用貼士

4. 留起說明書:

新電器、電子用品買返來,我哋好多時都唔睇甚至唔keep說明書,到件電器忽然變得怪怪哋又唔知點算,所以記得要將說明書收好呀!

5. 移動傢俬小裝置:

有時我哋想有啲新鮮感、將啲傢俬換過啲擺位,但係又搬唔郁啲大型傢具、電器,有個方法幫到手,就係喺第一次將傢具擺位時,先舖一塊地氈喺下面,咁到你要移動傢具時,就可以靠拉張地氈來借力,同時又唔怕整花地板。

獨居, 生活, 自己住,一個人住,貼士,實用貼士

6. 常備開蓋工具:

有啲瓶瓶罐罐好似唔預女生要扭開咁,一個人煮煮下飯打唔開支乜乜醬,係會令人忟到爆炸嘅!所以記得常備任何自己覺得啱用嘅開樽蓋工具,例如橡筯、膠手套、for開蓋專用嘅小工具等。

7. 將連身鏡放喺當眼處:

當屋企無其他人時,就無人會提你「你條眉畫歪咗」、「條裙戚起咗」之類,所以出門前照嘅鏡要放喺光猛處,如果唔係好易走漏眼

LOAD MORE