柳俊江:感情不止講有幾愛,也要講信任!

By COSMO

愛情, 兩性問題, 柳俊江
 
柳爺你好!
 
先簡單交代背景,我28歳,男友 29歲,已經一齊年半,以結婚為前題交往,已見雙方家長,兩邊長輩關係算不錯。男友對我算OK,例:去玩係佢安排行程、有時工作再攰都會特登搵我食飯、重要日子都會一齊過。表面好似好完美,但佢有啲事,令我好難過同不滿。以下事件係佢自己主動承諾,我從來冇明示或暗示佢去做:
 
啱啱拍拖嗰時佢話買咗隻戒指俾我,我會覺得開玩笑,當然自己有暗暗期待,過咗半年我有日諗起,口痕問佢,佢話:「係!我真係有買,但我借咗俾細佬求婚,但佢未求婚已經同佢女友分手,細佬冇錢買戒指,又覺得拖咗人好耐,佢女友又為咗佢落咗幾個BB,所以借俾細佬。」我當然好不滿!一,如果成功我感覺會好受啲,但佢失敗咗,仲要咁大個人冇錢,學人借戒指求婚。二,當日你主動承諾,雖然戒指喺你手,你有權送或唔送,但你已經買咗都冇送俾我,我會覺得係咪我唔值得你送嘢俾我,或者我係犧牲品?之後佢都不了了之,只係覺得抱歉。
 
呢件事係近期發生,我搬咗出去住,佢話房租一半,會俾定成年租金我先,但遲遲未有,我已經好不滿。有一日,我又忍唔住問,你啲錢洗哂去邊?佢先主動講俾哂屋企人醫病,驚我唔開心,冇時機,唔知點開口講。事實佢有家人係長期病患,醫療藥費開支重,我明白要盡孝,如果你早日同我講我唔會咁嬲。
 
大大小小類似事件不停發生,我越來越無信心喺呢段感情,好多白色謊言,溝通咗好多次,但改變不大,好多問號同委屈,點解佢會咁對我。
 
A小姐
愛情, 兩性問題, 柳俊江
 
A小姐:
 
聽你描述,其實你男朋友有頗嚴重的財政壓力,又似乎羞於啟齒,不想你知道太多。當中有多少是真話,多少是假話,我想你心中有數。你沒有太多的資料,我不想就此去判定你男朋友的可信度,但你必需要對自己誠實:你到底是否相信他?
 
年輕的男生都下巴輕輕,容易許諾又容易忘記,全因為能力有限又想像太大,最終事事不了了之,就出現你遇到的狀況。從情感的角度出發,你認為男友對你的好,似乎是停留在「當一個伴」的水平,但要他照顧你又沒有能力。從實際角度出發,他的家庭似乎危機處處,作為女朋友你是不是可以無條件去遷就,甚至在經濟上和他分擔?大家是成年人,要面對實在的問題。搬出來同居以為甜蜜蜜,誰知道在交租問題上爭執,講錢傷感情,是最沒趣的分手原因。與其這樣,倒不如不要展開這一步。
 
回到基本,一段感情不單止講愛有幾多,也要講信任有幾多。男人可能會成長,可能會言而有信,但這要視乎他的本質和能力。到底是否走下去,你撫心自問,你信不信任他,對未來的他是否有信心,能夠扭轉這個局面。如果沒有,盡早止血也不是傻事。
 
柳爺上
 
柳俊江

柳俊江 Ryan

人稱柳爺,已從情場退役,樂意為一眾迷途少女指點迷津。

 

如果你遇到任何愛情上的疑難,都歡迎e-mail到editorial@cosmogirl.com.hk(Subject: ask CG!),愛情專家團隊會於CosmoGIRL!網站為你解答!

 

LOAD MORE