韓劇《她很漂亮》的4個亮點!

by 韋寶

小編無煲韓劇一段時間,不過《她很漂亮》就重燃起我對煲劇嘅熱情,因為呢套劇有4大亮點:
1.感人的友誼線
唔少韓劇嘅focus都落喺愛情線,但呢套除咗愛情線,對女主角金惠珍(黃靜茵飾)同朋友夏莉(高俊熙飾)嘅友情描寫都有一定篇幅,而且當中嘅劇情都幾感動架。
好似惠珍無怪夏莉鍾意咗男主角成俊(朴瑞俊飾),仲因為驚夏莉受傷而暫時無同成俊一齊。而夏莉雖然情難自控,但都打算自己同成俊交代返成件事。
2,搞笑非常的崔始源
飾演金信赫嘅崔始源喺呢套劇入面真係好搞笑,而且表情多多,小編好記得佢為咗保護惠珍、唔俾成俊發現塊砌圖而攬住成俊嗰幕呀!而且劇中成日都好唔正經嘅佢,其實好深情,真係越睇就越同情兼鍾意佢!
3.因內在美而愛上
成俊同信赫鍾意惠珍,都係出於欣賞惠珍嘅內在美,呢點小編真係超鍾意!好記得信赫諗起見到惠珍扶婆婆坐好先叫司機開車,然後就講咗句「真的好美」嗰一幕。
小編深信一個真心愛你嘅人,係無論你有無化妝,又或者個樣隨住年紀漸長而老去,都一樣會咁愛你。
4.男女主角的演繹
呢套劇係《Kill Me Heal Me》嘅「男二」同「女一」做男女主角,未睇之前小編已經有啲期待。
 
今次雖然女主角嘅角色成日都好嘈咁,但黃靜茵好演繹到嗰種傻更更同好善良嘅性格。而朴瑞俊飾演嘅成俊超有魅力,上次喺《Kill Me Heal Me》好搞笑嘅佢,今次雖然主力耍帥而唔係行搞笑,但有啲表情小編都覺得好好笑架!
 
圖片來源:微博、instagram、Facebook
LOAD MORE