港姐:男女之間有沒有純友誼?

By COSMO

愛情問題, 港姐, 愛情信箱

Dear CG!:

其實我呢刻只係想搵個平台講下自己嘅心情,同埋叫做俾自己面對下我對一個人嘅感情,再提醒自己唔好再浪費自己時間。

我今年20歲,18歲有過一個好短暫但係我好鍾意佢嘅男朋友,分手原因大概係因為佢對我嘅新鮮感冇咗,所以毫不留情咁飛咗我。之後我到而家都單身。而今次故事嘅人係我19歲識嘅,到依家同佢識咗一年,係玩camp識嘅。我同佢呢年入面都冇同其他人拍拖。

記得啱啱識佢嘅時侯,佢俾我嘅感覺係外表好靜但其實內心好熱情嘅人,唔知點解我哋發現咗有對方嘅存在之後,就有一種好熟悉嘅感覺,之後喺嗰3日2夜我哋一有機會就坐埋一齊,有時未必會有好多嘢講,但總係想搵返對方。同樣嘅camp我都唔係第一次玩,之前識嘅人好多都係完咗camp後就唔會聯絡,所以都覺得呢種感覺只係會維持幾日。

但係完左camp後,我哋好有緣,係兩個lecture嘅同學,所以又一齊玩。我自己本身都係多異性朋友嗰類人,而佢身邊亦都有唔少嘅異性朋友,所以佢對我嚟講普通朋友。我哋又因為住得近,所以一開始會一齊返學,完咗堂又會一齊食飯一齊走,高峰時期就算嗰日冇堂,我哋都會係約喺學校食飯見下吹下水咁,有時同埋佢嘅中學同學,有時只係得我哋。返到屋企都會keep住WhatsApp,雖然啲話題都係好無聊,又成日迫我聽佢唱歌,而我亦都會日日鬧佢好煩我唔想知。我嗰時真係冇諗啲咩,只係覺得好夾。嗰時我哋有camp嘅reunion都會一齊出現一齊走,之後罷課期間同佢一齊喺金鐘過咗一日,就算俾人話我地「行得埋」同「應該有啲嘢」我都冇理到,因為我知我哋嗰時嘅相處同溝通內容都係普通朋友,只係比平時嘅異性朋友見多啲。

但當咁嘅相處方式維持左一個月左右,有一日佢陪我一齊搵我個best fd教返上堂唔明嘅嘢到晚上12點幾,佢送我返屋企嗰時如常咁同我鬥下嘴講下笑,講講下佢開始問我一堆無聊問題,係關於我哋識嘅人入面邊個好啲,跟住突然認真一下,問我如果A先生(係一個公認為極不受歡迎嘅人)同埋佢,我會揀邊個,我嗰刻好似啞咗咁望住佢,明知個答案係佢,就唔知點解講唔出口,只係講咗句:「你做咩對自己咁冇信心呀」,當然佢有追問落去,我依然好似啞咗咁,開唔到口。最後只係好似平時同佢鬥氣嘅語氣咁應咗句:「哎呀,行啦仲講!」。

喺嗰下我都係覺得佢係無聊,都係識咗一個月,唔係對我有嘢掛,我同佢只係啱玩啫,之後都冇再深究點解自己唔可以大大方方咁答佢。

愛情問題, 港姐, 愛情信箱

如是者,日子一日一日咁過,大家都開始要趕assignment同mid-term,見面嘅時間比以前少,然後我自己一個時開始諗起件事,於是就同我best fd講起佢。我best fd見過佢兩三次唔係好熟,但覺得佢份人其實幾怕羞但又有啲大男人,覺得佢咁問我唔係咁簡單。我第一時間係反對,因為佢係我面前係冇一刻靜過同愛過面子。之後我再講返嗰幾個月嚟同佢嘅相處,我best fd一句:「你哋都算經歷得多喎...你真係唔知咩...」

於是我開始諗,佢唔係以朋友嘅身分喺我身邊咩?佢鍾意我點會唔同我講呀?

其實佢冷淡嘅外表裏面,對住我發癲嗰種熱情唔係人人都係咁 ,佢見到我朝9晚9咁上完堂直落趕project攰到做錯晒啲嘢要重做,會默默幫我做埋我嗰part,我有時好攰想返屋企,唔同佢同佢中學同學食飯,佢雖然好煩咁話唔陪佢就絕交,但最後都係放過我俾我返屋企……同佢一齊夜返,佢都一定送我返屋企,之後自己行半個鐘返屋企。佢生日本來應承佢請食雞脾,但我group mate一句要練present我就即走……

記得佢問咗我一句:「你走嗱?」

我:「係呀,佢地話要練present呀,你中同可以陪你呀嘛。」佢就同我講再見……

總之佢叫我陪佢我可以唔陪,但我叫佢就一定唔會拒絕。之後我先發現,原來每一個細節,都無聲無息咁比朋友多咗啲,而我,從來都冇在意過。

或者我個人好直同好蠢,覺得咩都要講清講楚我先會知。加上我一直覺得男女之間係有純友誼,所以我真係唔知佢嘅出發點係咩。

愛情問題, 港姐, 愛情信箱

之後考完試,開始第二個Sem,我身邊再冇佢喺度,我先開始察覺到佢對我嘅好……

就係我哋識咗第5個月開始,角色開始掉轉。我變咗主動搵對方,以前都係佢陪我做我想做嘅事,而家係我陪佢。佢之前WhatsApp應我好快,而家就隔兩個鐘先應兩句。見面嘅次數都越來越少,開頭日見夜見,之後而家兩個月一次。慢慢咁,我再得唔到佢嘅好。

當咁嘅情況維持咗兩個幾月,我開始發覺問題出現。我同佢已經唔會再好似以前咁。於是我好努力咁唔搵佢,成功過咗兩個月,當我發現自己對佢好似冇咁着緊嘅時候,佢又突然出現話等我考完試一齊去玩,我當時咩都冇諗即刻話好。我哋嗰日傾咗好耐,我以爲我哋會好似以前咁,我以爲佢會返嚟我身邊。嗰陣係已經識咗9個月。

係嗰日我同佢出街,從來未試過咁開心,一齊睇戲,食早午晚三餐加糖水,我哋去咗好多地方,一齊做好多傻事一齊大笑之後俾人望住,佢仲叫我要學煮野食唔係會冇人要,佢講依句時嘅眼神係同佢係好耐之前問我嗰個問題一樣,所以我記到而家。最後佢亦都有送我返屋企,而嗰日嘅洗費接近係佢出哂。其實我覺得,嗰日除咗冇拖手,講嘅嘢同做嘅野都好似情侶。

過咗一星期我哋又出街,我以爲我哋會一齊,點知最後都冇。佢又突然間冇咗熱情,我當然好失望,之後我哋就冇聯絡兩個月。

愛情問題, 港姐, 愛情信箱

就喺兩星期前,我收到大公司offer,於是揀咗出嚟做嘢,佢就繼續讀書,所以想同佢食餐飯慶祝。我知道大家疏遠咗好多,將來條路亦都唔會有重疊嘅機會,於是我同自己講今次係最後一次同佢出嚟,依段關係拖咗咁耐我覺得攰啦。

嗰日,我其實唔開心唔捨得,於是同佢食飯時飲左咗幾罐啤酒,可能太耐冇飲,我行唔到直線同凡high high地,佢揹我番屋企。我喺佢背時諗,最後一次見佢……心諗:「多謝你俾咗呢個回憶我」,後來我估自己應該瞓咗一陣。佢個人好正直,佢真係唔會對我點,到咗我屋企門口就放低我,之後就行半個鐘返去。我嗰晚WhatsApp佢多謝佢揹我返嚟,之後好大膽咁加咗句"love you",佢只係應我「你都唔係好重啫」,之後當第二日我清醒返睇晒成件事,我知道真係最後一次啦。

我只係覺得曖昧關係令我覺得攰,雖然係甜蜜,但好冇安全感。我始終都係需要一個身分、一個真實嘅關係。讀中學嗰時我都有過幾段曖昧關係,以前會覺得刺激新鮮,亦都唔會好似呢個人咁維持咁耐,而家只係覺得不如攞啲時間嚟進修讀書,自己休息下算啦。

我知自己心入面仲有佢,雖然我知日後佢再搵我 ,我都可能唔會唔理佢,但我同自己講,要肯定咗自己真係對佢唔會有感覺先好見佢,因為佢而家俾唔到我想要嘅嘢我,最後只會傷害自己、浪費大家時間。

多謝你睇到呢度,或者最後我都想知你哋對於男友人間有冇純友誼嘅看法,俾我多個思考方向嘛,Thanks CG!。

祝安

By C

愛情問題, 港姐, 愛情信箱

C: 

「到底男女之間有沒有純友誼?」這問題及其答案根本沒有任何具體意義。你跟他之間的是否純友誼才是真正的重點。

你自己深知你對他的感覺當然不是純友情,或者一開始是,但後來不是。而他對你,一開始明顯不是,但後來漸漸步向是。

可是時間就是一切。即使兩個人都對對方有同一種感覺,但不是發生在同一時間,也是無用及無奈的。

既然已經錯過了相愛的時機,又不能承受曖昧的疲憊,用時間去隔離及清理一切的確是最佳選擇。

而我相信,時間及後又會實實在在、清清楚楚地向你證明那些真正屬於你的愛情。

港姐

港姐,一名八十後港女人格分裂而出現的角色,深信無論男女,人人心中都有一個開不了口的港女。虛構但真實、嘴賤但心軟。是悲觀的樂觀主義者、現實的浪漫主義者。不懂花言巧語,只知實話實說。
 
如果你遇到任何愛情上的疑難,都歡迎e-mail到editorial@cosmogirl.com.hk(Subject: ask CG!),愛情專家團隊會於CosomGIRL!為你解答!
 
LOAD MORE