破壞上班族健康的幕後黑手!

by juju

上班族, 返工, 辦公室, 職場, OL, 健康, 日常生活

有無覺得自從返咗工一段時間之後,身體狀態好似差咗?容易病咗?身形又好似無以前咁fit?工時長、壓力大係上班族嘅「工作特色」,咁就要提防喔!

黑手1:坐定唔郁

好多辦公室上班族返10個鐘就幾乎坐足10個鐘,身體成日固定同一個姿勢,無論對消化系統同脊骨都唔係好事,有啲人仲會忍住唔去廁所住添。

建議:

好多人會話:「無計,工作需要,如果唔係做唔晒啲嘢......」不過咁喎,身體係自己嘅,搞壞咗,想搞返好就唔係咁易架喇,而且死坐死做唔代表工作效率一定高,反而適當咁俾自己鬆吓,個腦筯仲會清醒啲、集中啲。所以每隔20-30分鐘就起身郁吓,做啲簡單嘅伸展動作、行去pantry斟茶、去洗手間等等,俾身體鬆一鬆。

上班族, 返工, 辦公室, 職場, OL, 健康, 日常生活

黑手2:求其食

有研究指出,人傾向順應大多數人嘅取向行事,包括食咩,例如同你食開晏嘅同事習慣食燒味飯、無汽水薯條不歡、去極都係嗰兩間味精茶餐廳,其他人喺潛移默化之下會容易跟咗佢哋。另外亦有啲人費事出去食,索性喺公司邊做邊食,或者邊上網、煲劇邊食,食得咁唔認真,可能無幾耐之後已經唔覺自己有食過啲咩,然後開始搵零食。

建議:

慎選食晏飯腳,鍾意試新嘢嘅同事係唔錯嘅選擇,因為佢哋願意去一啲人哋提議嘅地方,變相亦增加咗大家嘅選擇,不妨去啲要行遠少少嘅地方食,行多啲,對大家身體都有益。帶飯係健康嘅,但記住要專心食,有時間剩,不妨出去附近公園、靜啲嘅街道行下,接觸陽光,吸收下維他命D。

上班族, 返工, 辦公室, 職場, OL, 健康, 日常生活

黑手3:壓力

當壓力荷爾蒙皮質醇水平飊升時,人就會想食啲甜嘢、油膩嘢去減壓,呢個時候如果你無零食,你就會走去常備零食嗰個同事度......

建議:

自己常備較健康嘅食物喺雪櫃或櫃桶,例如生果、紅蘿白、蕃茄仔、低糖 / 無糖yogurt、綜合果仁、黑朱古力等。平時喺個位放啲自己鍾意嘅嘢,例如心愛寵物嘅相片、綠色小盆栽之類,每次皮質醇被提升時,就攞啲盆栽去淋下水、幫相片抹吓塵 / 擺吓位,等自己平靜落嚟。

LOAD MORE