港姐:未婚懷孕的你先好好計劃自己人生吧!

By COSMO

愛情問題, 兩性關係, 未婚懷孕, 港姐, 人生計劃, 愛情信箱

你好,

我叫呀K,今年26歲,我同而家個男朋友喺上年識嘅,早兩個月一齊咗,佢一直都對我好好。

我哋一齊咗兩個禮拜之後就有性行為,結果我到而家都未嚟 M。期間有用過驗孕棒驗過兩次都有紅線,我有同佢講我可能有咗,佢嘅回應係依家早得滯,如果遲多半年會好啲,因為依家未準備好,錢又無,BB 出世唔知住邊。咁佢都有問返我意見,我就一直都覺得落仔係好折墮嘅事,所以都係想生,咁佢就話好,不過都係去揾醫生驗咗確認咗係先算。

上個禮拜同佢去完旅行,有晚我瞓唔着,佢就瞓到死豬咁,我就拎咗佢部電話嚟睇,原來佢一直都有玩一個叫「陌陌」嘅交友 App,而且仲成日都有女撩佢,咁我嗰晚就開咗佢哋啲對話嚟睇,發現原來佢會問嗰啲女有無掛住佢,仲會問人哋幾時約炮,同埋話自己無女朋友,我睇返個日期,果陣我哋已經一齊咗,我嗰晚喊左好耐,第2朝起身我開返佢呢啲信息俾佢睇,佢話嗰啲只係吹水,唔係真嘅。我嗰吓覺得好荒謬!好講唔講講呢樣?但我已經喊到講唔到嘢,之後佢應承我唔再同佢哋傾呢啲嘢。

事後我情緒平伏返之後,我問咗佢幾個問題:

我:你仲愛唔愛我?
佢:愛。
我:個BB仲要唔要?
佢:如果可以遲啲就最好,咁你點睇?
我:你知我唔想落BB架!
佢:嗯,咁我哋辛苦少少一齊養大佢好無?
我:好。

但其實我對信息嗰件事始終好耿耿於懷,因為之前曾經有過男朋友都係因為同第二個女仔有曖昧信息而導致分手,而我身邊亦唔少呢類男性朋友(自己已經有穩定女友,但都仲會去識女仔嗰啲),其實同呢個男朋友一齊之前我單身咗3年,因為過去不愉快經驗令我對愛情變得好無信心,唔相信呢個世界仲有好男人。

直至依家呢個出現,佢由識我開始追我,追咗我4個月,好肯花時間陪我,照顧我,佢毎日都要朝早6點起身,但成日都陪我到凌晨2至3點,仲要送埋我返屋企,但前提係我住九龍佢住港島。其實佢對我係好好,而我都好愛佢,發生咗呢件事之後,身邊朋友都叫我落咗個BB佢,呢個男人未玩夠,唔值得你付託終生。但我又覺得如果佢係未玩夠,佢大可叫我落B,而唔係應承同我一齊養大佢,我唔知我咁諗到底係啱定唔啱。

呀K

愛情問題, 兩性關係, 未婚懷孕, 港姐, 人生計劃, 愛情信箱

呀K:

你這樣想到底是對是錯沒人可判,但從上文來看,你根本整個人的想法都天真幼稚得過份。

一,你連最基本的安全性意識都沒有。除了不懂保護自己的身體,更不懂保護自己的人生。就因為做事時不想後果,令自己現在要面對這樣的困局。

二,落仔折墮,而更折墮的是生了卻無能力好好撫養,害一個無辜生命為父母的不成熟而來世上活受罪。由你選擇不用保護措施那一刻起,已注定折墮。

三,追你時當然對你很好、一開始時當然對你很好、面對你時當然對你很好。但如果真的如你所說所以為的那麼好,那麼相戀還不過一、兩個月便用交友App試圖默默地約陌生人交配,這也可算好?你對於好的定義以及你的邏輯實在非常奇特。

四,基金佬也永遠對客戶講這個投資包賺的。到你蝕掉老本時,還不都是你自己的事?「承諾」有幾難?講啫!出幾滴口水便可。你當然可以選擇相信,但人生賭博涉及具大風險,結果只有自己承擔,請作好心理準備。

這個男人是否能讓你負託終生其實不是重點,重點是你自己根本也未思想成熟到可以讓一個新生命來負託他/她的終生於你。在決定負責起一個新生命之前,煩請你先負責、計劃、思考好你自己的人生。

不過既然你連身邊朋友的分析、勸告你都聽不進去。這個回覆,相信你亦根本不會認真看待。

唯有敷衍講句:祝你好運。

港姐

港姐,一名八十後港女人格分裂而出現的角色,深信無論男女,人人心中都有一個開不了口的港女。虛構但真實、嘴賤但心軟。是悲觀的樂觀主義者、現實的浪漫主義者。不懂花言巧語,只知實話實說。
 
如果你遇到任何愛情上的疑難,都歡迎e-mail到editorial@cosmogirl.com.hk(Subject: ask CG!),愛情專家團隊會於CosomGIRL!為你解答!
 
LOAD MORE