心理測驗:母女關係中,你係咩類型嘅女兒?

by juju

母女關係, 人際關係, 生活, 心理測驗, 女兒角色

個個做女嘅,都識話阿媽點點點(私底下),其實自己又知唔知自己係一個點樣嘅女兒角色?有咩優點同缺點?玩下呢個心理測驗,有助自我檢討。

Q1. 你自己搬咗出去住,阿媽攞湯嚟俾你飲時,見到一地都係污糟衫,馬上動手幫你執,你會:

A. 同佢一齊執,話佢知你鍾意啲嘢點擺。
B. 唔出聲,轉頭同你男友呻。
C. 由得佢,唔想阿媽難受。
D. 叫佢坐吓,唔使執啦。

Q2. 阿媽叫你同男友周末返去食飯,你會:

A. 開心應承,知道實有好嘢食。
B. 買定啲嘢上去一齊食,因為阿媽煮啲嘢未必啱你男友胃口。
C. 唔係好願,但都應承。
D. 亂作話買咗演唱會飛。

Q3. 你第一次帶男友返屋企,阿媽問長問短,結果男友嚇到面青口唇白,你會:

A. 搵機會入廚房細細聲提阿媽唔好問咁多啲尷尬嘢。
B. 同男友講唔使對阿媽啲問題太認真。
C. 唔想火上加油,盡量唔出聲。
D. 當場忍唔住發咗脾氣,同男友提早走人。

母女關係, 人際關係, 生活, 心理測驗, 女兒角色

Q4. 假設你中咗獎,獎品係3日2夜雙人郵輪假期,但條件係要帶埋阿媽,你會:

A. 諗唔到唔去嘅理由!
B. 照去,不過同阿媽講明你會自己去做spa、游水,叫佢到時自己四圍行下。
C. 唔想去都照去。
D. 唔使錢都唔去!

Q5. 公司升你職,但一個星期有一半時間要出差,你即刻同阿媽開心share,但佢第一個反應係:「咁你咪無晒時間?咪好少留喺屋企?」,你會:

A. 同佢講你明白佢嘅感受,同佢商量吓點分配時間。
B. 由得佢自顧自講落去,自己個腦已經幻想緊充滿新鮮感嘅工作。
C. 唔知講咩好。
D. 話佢知佢唔會明白呢啲機會幾咁難得。

Q6. 你要去一個禮拜旅行,但屋企有2隻狗,阿媽提議到時上嚟幫你餵狗放狗,你會:

A. 唔該都嚟唔切!
B. 寫張守則俾佢,要佢跟足時間表去做。
C. 接受佢嘅好意,雖然本來你已經安排咗朋友嚟幫手。
D. 話你自己會搞掂。

母女關係, 人際關係, 生活, 心理測驗, 女兒角色

分析:

答最多A  :模範型

你個性包容、淡定,EQ又高,視媽媽如朋友多過阿媽,亦好接受媽媽嘅個性。當你唔同意佢嘅一啲觀點時,你會願意講出自己嘅諗法,同佢保持溝通。今個母親節,你嘅任務係同其他女生分享同阿媽嘅相處之道!

答最多B :陽奉陰違型

你好少當面同阿媽理論,通常都係唔聲唔聲,但我行我素,做自己認為啱嘅事,唔係太理其他人嘅感受。雖然你哋好少正面衝突,但彼此嘅隔膜同時已經响長期缺乏溝通嘅情況下成形。响母女關係中,嘗試易地而處會係你最大嘅課題。

答最多C :逆來順受型

為咗唔想有拗撬,就算阿媽嘅建議同批評幾咁唔啱聽,你都唔會開口反駁,寧願自己暱埋唔開心。長期咁樣收收埋埋,唔敢俾阿媽知道你點諗、有咩感受,最終只會獲得一個不誠實兼沮喪嘅母女關係。想改善關係,攞出勇氣同阿媽分享你嘅諗法,會係你最大嘅挑戰。

答最多D :撈亂骨頭型

你寧願宅响間房發霉,都唔想同阿媽去飲個茶。你同阿媽就好似火星撞地球咁,一觸即發,成日為啲小事爭執,無論佢俾咩意見,你都覺得佢喺度批評你、挑剔你。如果想修補關係,你首先要做嘅係鍛鍊耐性,嘗試唔好去批判佢講嘅每一隻字,你或者會發現有時阿媽嘅睇法都幾獨到!

LOAD MORE