柳俊江:不應留戀已逝去的愛情!

By COSMO

愛情問題, 兩性關係, 分手

Dear CG!:

你好,我叫Kay,我同男朋友分手半年,分手之後佢好快就有女朋友都好快又分手又再有女朋友……佢咁快可以忘記我重新開始,我開始懷疑佢根本無愛過我,佢令我對愛情無信心,拍拖以嚟我自問擺佢喺第一位,我哋甚少鬧交,就算有都係當日解決,而且我地性格嗜好都相似,我唔明點解會突然間覺得唔適合就要分手……佢話想做返朋友,我覺得放手嗰個係佢,所以佢可能可以做到,但我自己真係唔得,所以之後都無再同佢聯絡。前排佢有搵返我,又係話想做返朋友,我真係唔明點解,佢明知我仲未完全放低佢,而且有必要做返朋友咩?

其實我同佢喺同一間公司做唔同部門,但基本上除咗放假,日日都會見面,雖然分開咗半年,到而家仍然會時不時諗起佢,當我見唔到佢個人我真係無太大感覺,但每次見到佢我真係覺得好唔自在,好唔舒服……有時見到佢傾電話傾到好開心,我就會估應該係佢女朋友,就更加令我唔舒服,我覺得自己好衰,好似好唔想佢開心咁,我明白佢啲事已經唔關我事但我都唔知點解會有呢種感覺,我有諗過轉工但朋友都叫我唔好咁傻為咗佢轉工,加上我幾鍾意而家份工,但我真係好唔想再見到佢,而且公司將會有個project我哋兩個部門要合作,到時唔只見得仲多,仲要成日溝通,我驚對住佢會影響工作表現……除咗轉工之外我真係諗唔到有咩辦法……究竟我應唔應該轉工??麻煩CG!教教我可以點做,Thank you!

Kay

愛情問題, 兩性關係, 分手, move on
 

Dear Kay,

呢個世界有兩類人。一類是精人,另一類,是笨人,笨人除了崔世安之外,仲有一個叫阿KAY,即係你。我唔知你幾多歲,但你話你係上班族,斷估應該成年,應該有理性同分識能力,但係你似乎弱啲。唔好怪我話你,但係成年人的愛情,你用學生妹的態度去應對,抵俾人話。

成年人的愛情,即使結了婚,離離合合常有,未結婚更加平常,舊的不去,新的不來,是現在社會的普遍現像。可能你仍然迷戀小說式的從一而終,電視劇的忠貞不二,不過先決條件是找到一個和你一樣笨的浪漫主義稀有動物。其實,你前度有沒有愛過你,還重要嗎?他感情生活開心否,關你何事呢?你問這一堆問題,其實內心只有一個答案:「要再做情人。」你不面對,就只有繼續煎熬自己,繼續影響工作,繼續當一個念念不忘、人見人怕的怨婦。

好了,如何解決?撫心自問,你有沒有勇氣提出復合?有勇氣的話,儘管去做,愛情不是愛神恩賜的,而是自己爭取的。爭取不成,或者再一次分手,起碼能夠死心,MOVE ON﹗又或者,在這一刻你明白,他根本不重視你,亦不關心你生活得快樂或鬱結,請爽快地把對這個人的好感移除﹗如果你因為一個不關心你的人而轉工,你就是笨人之中的笨人,我也無可奈何﹗請把他當一個普通同事,不用避,也不必仇視,淡淡如水,專心工作,專心找尋你新的幸福。

柳爺上

柳俊江 Ryan

人稱柳爺,已從情場退役,樂意為一眾迷途少女指點迷津。

如果你遇到任何愛情上的疑難,都歡迎e-mail到editorial@cosmogirl.com.hk(Subject: ask CG!),愛情專家團隊會於CosmoGIRL!網站為你解答!

LOAD MORE