拜年必備!19款精選中式賀年禮物

by 韋寶

農曆新年話咁快就到,又係時候要物色賀年禮物俾長輩同另一半嘅屋企人,所以CG!就為大家精選咗一啲既大方又得體嘅新年禮物,等我先為大家送上中式篇啦!
燕窩薑汁三色糕
1.燕窩薑汁三色糕 $178

逸東軒全新推出嘅燕窩薑汁三色糕以金黃色為主,寓意金玉滿堂。大廚先將鮮榨薑汁去渣,再拌入桂花糖,所以食落除咗有薑汁味,仲帶有桂花香,而且年糕中間仲有一層白色嘅椰汁層架!

銷售點:逸東酒店逸東軒
供應期:2015年2月11至17日,只適用於外賣。


2&3.益生野菌蘿蔔糕 $228、低糖椰汁年糕 $208

呢款益生野菌蘿蔔糕入面有羊肚菌、牛肝菌、花菇、榆耳及黃耳等,如果長輩係食素嘅話,送呢款蘿蔔糕俾佢就啱晒啦!另一款健康之選係低糖椰汁年糕,糖分減少咗,咁就無咁高熱量喇!

銷售點:怡東酒店怡東軒
供應期:即日起至2015年2月18日


4.燕窩咖椰年糕 $438

曾於新加坡工作超過19年嘅莫師傅用上印尼頂級燕窩配以咖椰,炮製出呢款富新加坡風味嘅燕窩咖椰年糕!


5 & 6.人參年糕 $268、原隻鮑魚黑松露蘿蔔糕 $438

人參年糕係選用南韓人參並加入人參酒製成,食落真係有人參味,送俾長輩就至啱啦!至於原隻鮑魚黑松露蘿蔔糕係香宮團隊精挑由意大利入口嘅黑松露,並配以南非八頭湯鮑整成,夠晒體面呀!


7.五福臨門 $688
喺限量版手製花型瓷盒中,盛載住五種不同產地嘅特色果仁及顏色不一嘅海鹽,包括印度腰果、巴西堅果、夏威夷果仁、美洲山核桃及菲律賓火山果仁。呢啲果仁嘅製作好特別,以市面上較為常見嘅印度腰果為例,師傅為佢選配帶有煙燻味嘅橡木煙燻海鹽,同時加入香草、咖喱粉、黑胡椒及洋蔥製成!

銷售點:九龍香格里拉大酒店香宮或位於酒店大堂的新歲商店選購
供應期:即日起至2015年2月18日

8 & 9.鴻運棗蓉年糕 $228、馬蹄雪耳糕 $228

帝苑酒店全新推出嘅鴻運棗蓉年糕同馬蹄雪耳糕感覺好清潤養顏,而且無添加防腐劑架!

銷售點:帝苑酒店
供應期:即日起至2015年2月18日


10.紫薯黑糖年糕(零售價:$115、特價:$82、滙豐信用卡65折價: $74.7)
11.芝士年糕(零售價:$115、特價:$82、滙豐信用卡65折價:$74.7)

東海堂全新嘅芝士年糕入面除咗有和式年糕,仲有Mozzarella芝士同車打芝士夾層。而紫薯黑糖年糕就以紫薯蓉配合天然黑糖,加上新鮮嘅紫薯粒製成,真係好吸引呀!

銷售點:東海堂
優惠:每個賀年糕點均附送精美保冷袋一個;憑滙豐信用卡簽賬,可享65折優惠,逢星期五、六、日,更可享額外95折優惠;優惠期有效至2015年2月19日。
供應期:即日起至2015年2月19日
禮券換領日期: 即日起至2015年2月16日(2月17日起只作現貨發售)
燕窩蘭香芒果糕,葡萄棗黃藏金糕
12.燕窩蘭香芒果糕 (前) $218
13.葡萄棗黃藏金糕 (後) $188


帝京酒店自家製作多款賀年糕點,今年亦加推創新口味,包括葡萄棗皇藏金糕及燕窩蘭香芒果糕。
葡萄棗皇藏金糕以棗皇製成,有健脾養胃、養血安神之效,中層配以清甜椰汁,仲加入咗葡萄乾,所以食落更有咬口!至於燕窩蘭香芒果糕係凍食嘅年糕,上層啫喱加入燕窩、清香菊花及纖維豐富嘅蘭香子,而下層則以菲律賓芒果製成嘅芒果糕,真係好創新呀!
銷售點:帝京酒店一樓帝京餅店
供應期:即日起至2015年2月16日(請於最少3天前訂購)


14 & 15. 椰汁紅豆糕 $86(左)、薑汁黑糖年糕 $92(右)

舊年食過奇華餅家嘅陳皮蓮子紅豆糕之後就一吃傾心,今年除咗呢款糕之外,仲推出咗全新嘅椰汁紅豆糕同薑汁黑糖年糕,前者可以冷熱兩食,而後者嘅糕身係由店家自家研磨糯米製成,加上日本沖繩黑糖同生磨薑汁,很想吃吧?!


16. 熊貓賀年禮盒 $208

此外,奇華餅家與海洋公園繼續攜手推出「熊貓賀年禮盒」,全新炮仗造型嘅包裝盛載住6款賀年美點,包括迷你亞嫲糖年糕、歡樂笑口棗、鬆化香酥角、手製椰絲花生軟糖、手製南瓜籽脆糖及手製鳥結糖,個盒仲好啱要嚟做全盒添呀!

銷售點:奇華餅家
供應期:即日起售完即止

17 & 18. 金栗紅豆沖繩糖年糕、鹿兒島厚切大根臘味蘿蔔糕 各$318

欣圖軒今年除咗有鹿兒島厚切大根蘿蔔糕,仲有新推出嘅金栗紅豆沖繩糖年糕。蘿蔔糕選用來自鹿兒島櫻島火山區著名農場嘅蘿蔔製造,而大根蘿蔔糕嘅粉漿由鯪魚豬骨湯底調配!至於金栗紅豆沖繩糖年糕共有兩層,分別係紅豆糕同金栗糕,當中金栗糕用咗雲南板栗製成栗蓉同粘米粉做成糕,再加入原粒栗子,口感好豐富啊!

銷售點:香港洲際酒店欣圖軒
供應期:現已接受預訂,可於2015年2月11日至17日每天下午1時至晚上10時內領取。


19. 大展鴻圖糕(普通禮盒$198、豪華禮盒$268)

呢個賣相精緻嘅大展鴻圖糕共分兩層,上層為紅色嘅傳統椰汁年糕,而下層紫色嘅則以紫心番薯製成,大紅大紫嘅顏色,好應節呀!

銷售點:海景嘉福酒店海景軒
供應期:即日起至2015年2月18日

LOAD MORE