我係咪有咗?

by Miss Sex

年中Miss Sex收唔少「我/我女朋友是否懷孕?」的心急來信,曾經作過答覆,但依然陸續有來,感到心痛之餘,亦相當無奈。

首先這種「人命關天」的問題,首要解決辦法並不是打封email俾Miss Sex,而是找醫護人員協助,尤其是肯定有精液流入陰道的個案,更加是刻不容緩,服食緊急避孕藥的成效可是以小時計遞減的。

而且,你問Miss Sex,Miss Sex都無法確切答到你。下次月經到來之前,到底有無懷孕並非yes or no的問題,而是機會率的問題。例如,只是隔着內褲磨擦,沒有射,那有機會懷孕嗎?無體內射精,照道理懷孕機會相當微,但不是完全沒有,因陰莖射精前還是有機會流出少量精子,接觸到陰部亦有機會游上子宮。睇新聞都見過有處女同男友廝磨成孕的罕見個案,很可怕吧?

而Miss Sex講過不知多少次,計「安全期」避孕非常危險,你講哂成個schedule俾Miss Sex知都無意思。因為女人唔係機械人,每個女人月經周期唔同,同一個女人每月又可能有變化偏差,邊日排卵同邊日落雨一樣,雖然可預測到大概,但不能作準,要等上天安排。今個月俾你避到,下個月照辦煮碗仍有機會出事。

對於想有BB同唔ready有的女人而言,由排卵日至月經來臨前那大概兩星期的時間,都是非常大的身心折磨,英語稱之為「two weeks’ wait」。Miss Sex只能很抱歉地說,時間才可以給你最確切的答案。如果在這段時間疑神疑鬼,仍住作嘔作悶、肚脹脹、暈陀陀,反而有可能因壓力太大令月經遲來,仲驚得耐啲。所以即使好難做到,亦希望你用平常心面對和等待。

最後,唔想下個月再煩心,盡力做好避孕措施是常識吧?

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE