繽紛動物園!PAUL & JOE 2015春日系列

by Stephanie

PAUL & JOE嘅妝品每一季都會帶嚟驚喜,因為每次嘅包裝設計都唔一樣,由花花、雪糕、迴轉木馬至貓貓圖案都有,而最新2015春日繽紛樂園系列就最啱鍾意可愛動物嘅女生!
 


春日繽紛樂園多用途彩妝粉盒 $ 360

3款全新限量色彩多用途彩妝粉盒除咗盒身有動物圖案,盒內嘅四色彩妝粉末都有動物壓紋點綴,分別係河馬(妝容重點色)、貓(眼影色)、天鵝(提亮色)及大象(胭脂或眼影色),非常趣致!
 

春日繽紛樂園唇膏芯 $ 200        春日繽紛樂園唇膏筒 $ 100

限量春日繽紛樂園唇膏就分開唇芯同唇膏筒售賣,每款唇芯同唇膏筒嘅動物印花圖案都唔同,可以自由mix & match,演繹出個人風格。而唇色為復古色調,容易配襯唔同妝容。

 


春日繽紛亮彩甲油 $ 160

系列仲有推出5款限量色調亮彩甲油,我就覺得湖水綠色最靚最襯春天,而甲油配方含具修護作用嘅有機植物油,有效保持指甲健康漂亮。

2015春日繽紛樂園系列於1月5日至18日於尖沙咀海運大廈Facesss、金鐘道金鐘廊Facesss LAB Concept美容專櫃、尖沙咀麼地道K11藝術購物館、旺角朗豪坊、屯門V-City PAUL & JOE 美容專門店及PAUL & JOE網上購物平台優先發售,其他地點於1月19日起公開發售。

LOAD MORE