Running Man in the house!

by Beth PHOTOGRAPHY: 邦


 
Running Man係就係其貌不揚,但勝在有親切感,7個人7把嘴,7款角色7種性格,總有一個似足你身邊的最佳損友,所以呢,5年來與觀眾建立的友共情,絕非國產山寨版,求其執幾個強國阿茂可以代替。就好似今次訪港,成員入住的酒店與佔中據點只是一街之隔,行程因封路受阻好唔方便,但大家訪問劈頭第一句就話,好想去勻香港各大學同學生玩遊戲,正能量滿注!雖然,暫時大家都未必有心情玩住,但好似石鎮在訪問自信滿滿,話自己總有一日可以撕掉鐘國名牌一樣,只要有信心,凡事都有可能。相信唔使幾耐,學生們就可以無憂無慮,再次care-free享受校園生活,下次出彌敦道,話唔定就係攞正牌同Running Man玩遊戲!
 
 
成員曾多次挑戰紙船大賽,成員用卡紙砌成船,同大學生一齊橫越韓國漢江!
 
1. 大家再次到港,最想做咩?
 
石鎮:我嚟過香港6次,每次都覺得香港人同粉絲好窩心。
光洙:每次嚟都係做嘢,好想stay behind周圍玩吓!香港有維多利亞港,我哋常同韓國大學生玩遊戲,有機會想同香港學生整紙船橫渡維港。
鐘國:香港有幾多間大學?8間?
石鎮:有機會想同香港的大學生玩畫片遊戲,因為係我強項!
鐘國:我直情想去勻咁多間大學同大家玩畫片,因為韓國學生每次都玩得好開心。
 
2. Easy兄弟(石鎮、光洙)在節目內成日背叛大家,但一時又攬頭攬頸,大家有無投訴?
 
石鎮:雖然我年紀最大,但經常都係大家照顧番我轉頭,不過我最近至發現,原來大家拍完節目都見得好密,私底下經常飯聚,但無叫我。
光洙:因為我係「忙內」(韓文解團內年紀最小的人,有後輩的意思),有責任服侍前輩,不過我大部分時間都係負責扮cute嘅角色,這是我的魅力所在。
哈哈:其實大家對對方都好有睇法,好似鐘國哥咁,佢真係好長氣,有運動員上節目,佢會教對方做運動,試過教亞運冠軍朴泰桓游水,教朴智星踢波,教K-1格鬥選手秋成勳摔角。
鐘國:我想大家更鐘意運動呀。如果香港運動員想切磋都可以搵我,最近我又鑽研緊新運動!

光洙得獎致辭
 
3. 光洙最近憑韓劇《沒關係,是愛情啊》獲第7屆韓國電視劇獎頒獎禮頒發「男子優秀賞」,大家點睇?
 
大家:恭喜晒。
哈哈:佢應該去釜山影展,點解喺度?
石鎮:佢真係有才華的話,早就去參演大型節目啦。
鐘國:但如果佢真係有才華,只演戲就太浪費。
智孝:光洙攞咩獎?
哈哈:「男子優秀賞」。
智孝:吓?真係得獎架?
光洙:無論點,還是要感謝大家。(尷尬)
哈哈:係唔係真心感謝架?
 
4. 可以講講光洙的人格問題嗎?
 
光洙:其實起初無諗過背叛大家,但鐘國哥很易信人,很自然想利用佢……
鐘國:佢不嬲都心術不正。
哈哈:一開始,佢只針對鐘國哥我覺得無咩問題,但影響埋大家就唔係幾好。
石鎮:而家基本上一roll機就無人信佢,佢呃人呃到好似上咗癮咁。
 
5. 鐘國玩遊戲成日都好認真唔留手,有試過嚟真激嬲對方嗎?
 
石鎮:打交就未試過,但初頭大家真係會嬲對方。
光洙:鐘國哥本來好信我,但試過背叛佢之後,唔聽我電話。
鐘國:宜家習慣咗啦。
 

左起:鐘國、 石鎮、光洙
 
6. 最近《Running Man》出了中國版,如果他日有機會拍荷里活版,想邊位明星出演自己的角色?
 
石鎮:要認真想想呢。
鐘國:哈哈,一定是阿諾舒華辛力加啦,動作演員Liam Neeson也不錯。
石鎮:Matt Damon好嗎?
鐘國:也可以,我知啦!The Rock!就The Rock做我啦!
石鎮:我覺德斯汀荷夫曼適合我的角色。
鐘國:哈哈,佢唔會上綜藝啦!
光洙:Liam Neeson點睇都似我多啲,大家都高。不過,我心目中最想就是《Notting Hill》做Hugh Grant朋友嗰個高佬Rhys Ifans做我。


李光洙變裝「光凡達」,幾可亂真。
 
7. 你哋成日扮鬼扮馬,奇裝異服搏收視,有無邊個造型真係醜到唔想見人?
 
光洙:(搶答)光凡達!造型唔係幾好睇。
石鎮:佢真係同阿凡達一樣無分別,好鬼好笑。
鐘國:初時好討厭扮女人,但一roll機愈拍就愈覺得觀眾會鐘意,所以會盡最大努力做好佢。
 
8. 大家鐘意自己的綽號嗎?
 
石鎮:初時都好在意“Race Start”呢個稱呼,因為我總係第一個被淘汰,然後遊戲才式開始,不過,現在我們的fan meeting以Race Start為名,又感到好光榮同幸福。
智孝:大家叫我Ace實在太過獎,都係oppa們幫我,至可以贏出遊戲。
哈哈:智孝今時唔同往日,佢輸咗會咬人,好恐怖。
石鎮:近排我狀態幾好,贏多咗,係我人生高峰,總有一日,我有預感可以捉住鐘國隻手,擰轉佢個身撕佢嘅名牌。
鐘國:那請你長壽一點。
 


Running Man》無劇本、無對白,全靠嘉賓臨場發揮,真實地睇到名人真性情,soft selling話咁易,所以係宣傳新劇、新戲的最佳promo,紅如Big Bang、2NE1都要上節目同主持肉搏。

LOAD MORE