鄺俊宇:了斷曖昧不明關係

By COSMO

你好,樹洞。我叫冬冬 。

一直有睇開你喺fb post嘅文章。你嘅文字能安慰心靈,看到他人寫給你的故事,很多感同身受,尤其你用歌詞融入,更加深感受。以下係我的故事,盼能得到你文字的慰藉。

我跟他已發生一年關係,認識他,是因我前度是他同事。跟前度分手後在朋友生日會上重遇他,離開時他跟我留下號碼。那時由於我未放低前度,想從他口中知更多,所以答應了。我哋好快就熟絡,大槪因為他亦有個放不開的人,大家好多相同嘅話題 。而且我哋興趣相似,見面次數越嚟越多。他對我的好,令所有朋友都覺得他鐘意我。但我知他心入面那人位置太重,所以我覺得唔係。

不過慢慢我發覺我鐘意咗佢,我亦試探問他,如果我鐘意你會點呢。佢答「唔好」 ,因為會傷害我。但日子再耐咗,我哋都覺得大家之間係比好朋友再多,不過唔會有咩發生。結果到我生日,大家半清醒下,發生咗關係……我好清楚表明我唔想不了了之,要搞清楚 。但佢答我,佢未放低前度,唔想咁開始,但佢係鐘意我。故事一直落去,我多次想放棄。不過一直佢都講佢係真心鐘意我,只係未係時候。

結果等多一年,佢係真係對我好好,但一講到身份,佢始終唔願意承認我。而且當我想放棄,佢從來都唔會留我,話唔想浪費我時間,想我搵到個真心相愛嘅伴侶,仲話佢介意我嘅過去,介意我係佢同事前度,介意佢媽咪唔鐘意我嘅外形,覺得我同佢性格適合做好朋友多過情侶。我聽到這些,真係好灰,既然係咁,又何必要一直對我好,又一直話鐘意我,我哋喺將來或者會一齊……我唔知究竟係欠缺啲咩,每次我問佢,佢就只答我對唔住,佢未可以比名份承認我。但這段時間,我相信他是沒有第三者。請問就這些你覺得我仲可以點?但要我而家放手我真係唔甘心,因為我覺得我哋會更好,亦相信我哋有將來。還是我唔去在乎身份就可堅持下去……其實我只想試試當一剎那幸運兒……何不敷衍我一次這樣的堅持……謝謝你,希望你有收到我的來信,畢竟我都係第一次寫信求助,再次感謝。

冬冬

冬冬:

謝謝妳的信任,感激「樹洞」這角色,讓越來越多朋友,喜歡跟我分享心事。

字裏行間,感受到妳很喜歡這個人,可是每次用力愛,那力度都彷若欠回應,像撲空一樣,兩人相愛,都需要找到各自愛得舒服的位置,但明顯,他把自己放在最舒服的位置,卻沒理會妳感受。

他最愛的人或不是妳,而是他自己。

承認一段愛情,是愛情最基本的禮貌,無疑妳很愛他,愛得就算沒安全感,也繼續愛下去,尤如踏鋼線,一失足,連性命也難保,但妳不理,一步一步往對面移近,想親手擁抱站在對台的那個他。

可是,他忍心嗎?為甚麼只有妳一個人移近,他不能主動一點走近,甚或把自己的鋼線也放上來,讓妳能兩腳都踏得穩,再逐步向幸福移近。

請想清楚,妳在憧憬跟他的未來,但他計劃的未來,有妳嗎?我不知道。最清楚不過的人,是妳自己。

這世上沒有無止境的等待,給自己一個限期,如果到某一天,他仍然沒勇氣承認妳跟他的關係,那麼鼓起勇氣的人,應該是妳。
鼓起勇氣,放棄一個不太愛妳的人。

加油,盼望妳最終能踏得穩,找到真正屬於自己的幸福。

祝君好。

鄺俊宇

鄺俊宇

喜歡文字的議員男生,以「樹洞」之名,細聽城市的愛情,著有《愛你,若只如初見》,《有一種幸福叫忘記》,兩作品輪流登暢銷榜首名。

 
如果你遇到任何愛情上的疑難,都歡迎e-mail到editorial@cosmogirl.com.hk(Subject: Ask CG!),愛情專家團隊會於CosmoGIRL!為你解答!
LOAD MORE