唔想笑死人?6大尷尬事處理方法

By COSMO

有無試過做yoga嘅時侯聽到有人放屁,好想大聲笑又唔好意思?見到有人喺街仆親,就笑到令當事人尷尬到極點?千祈唔好笑,因為下一個發生呢啲尷尬事嘅人可能就係你!面對呢啲突如其來嘅情況,你有無諗過點樣可以處理得好啲?

尷尬事1:放屁

身體要排氣,放屁係好正常嘅事,唔知幾時開始大家都覺得呢個係件瘀事,唔通有人會唔放屁咩?不過既然大家都認定係一件又瘀又會俾人笑嘅事,唯有乖乖哋搵一個得體又唔失禮嘅拆解法!

對策1:俾人發現時扮無事發生,人哋笑你就唯有以平常心看待。
對策2:用幽默化解尷尬,例如話:「個屁又唔聽話啦!無問過我就走出嚟!」
對策3:講聲唔好意思,你咁勇敢承認,其他人都唔好意思笑你啦。

尷尬事2:「妹妹」突然痕癢

如果正喺度同朋友享受晚餐,下體突然痕癢,你無可能當眾抓下體,亦唔能夠比人發覺你有異樣,呢個先係終極尷尬!

對策1:衝入廁所處理一下,如果係底褲邊令私處痕癢,只要拉好位置便可。
對策2:如果一定要坐喺原位,可以將雙腳分開,調整坐姿令下體分開,因為通常痕癢都係下體兩頰互相磨擦所致,分開兩頰會減輕癢的感覺。
對策3:如果情況持續,就要將你嘅注意力轉移喺其他事上,例如用力搣自己,因為身體係唔能夠同時處理痛同癢嘅感覺!

此外,如果你想了解下身痕癢的普遍成因,以及其他對策,可參考:難以啟齒的下半身痕癢

尷尬事3:停不了的打嗝

由細到大都聽過唔少停止打嗝嘅方法,飲水啊、閉氣啊等等,但好似無乜用?停止打嗝的方法有好多種,但唔一定每一種都適合你,以下有幾種方法,不妨試試邊種啱使。

對策1:閉氣一段時間,喺閉氣期間,要不斷吞口水,起碼吞兩次以上,到忍唔住先release。
對策2:狂吞10啖水,記住要大啖啲,而且全程要忍住呼吸。
對策3:如果你無化妝,又唔怕整濕塊面,可以試試將面浸入凍水大約半分鐘。
對策4:吞一匙羮分量嘅砂糖。

尬事4:街上仆倒

行路唔帶眼,掛住玩手機,唔小心仆親好正常,但如果喺大庭廣眾之下仆親,真係幾尷尬!如果有朋友喺你身邊,都仲可以一齊以笑遮醜,但如果你自己一個,究竟扮無事定繼續傻笑好呢?

對策1:扮無事,所謂「邊度跌低就邊度企返起身」,有儀態咁企起身,過一陣就無人記得件事啦!
對策2:如果你真係受傷,就唔好怕尷尬,一定要叫其他人幫手!
對策3:如果傷勢唔太嚴重,就企起身,並加上一個微笑,等旁人知你無事,返到家再處理傷口。

尷尬事5:胃氣過多

食得太多太快、飲汽水、嚼香口膠等都會令胃氣增多,雖然排胃氣比放屁無咁尷尬,但喺人多嘅地方始終都係唔好意思大大聲排氣,因為女生要時時刻刻保持儀態嘛!

對策1:飲一杯暖薄荷茶能夠減少胃氣排出,因為薄荷茶含有嘅薄荷醇,可以紓緩消化管道嘅平滑肌。
對策2:進食時應該慢慢咀嚼,咁就可以減少胃氣產生。

尷尬事6:尷尬部位流汗

身處香港呢個又熱又濕嘅地方,基本上夏天一走出街就會流汗,除咗擔心會有汗臭問題之外,喺身體某啲部位留低汗跡,都會令人尷尬,例如腋下、胸口,屁股位置。

對策1:著較深色嘅衣服,即使被汗沾濕,都無咁顯眼。
對策2:著一啲唔焗促、易排汗嘅衣物,例如用CoolMax物料製造嘅衣物。
對策3:使用止汗劑。想知邊款好用,可參考:8大止汗產品大比拼!

LOAD MORE