得男友兄弟歡心的4個好處

By COSMO

唔少女生都唔鍾意男友嘅死黨,好似佢哋就係自己嘅天敵,要同佢哋誓不兩立,每次出席男友嘅朋友聚會都以黑面示人,額頭貼住「生人勿近」咁。可能女生覺得男友班兄弟佔用咗自己同男友二人世界嘅時間,跑去睇波、飲酒根本無無謂謂,所以都唔願同班兄弟打交道,甚至希望男友疏遠佢哋,咁樣男友就可以完完全全屬於自己了。

呢種諗法大錯特錯!男友並唔係任何人嘅附屬品,朋友,對每個人都好重要,你唔鍾意男友嘅朋友,只會令男友難做兼無面,而且某程度上都代表你唔接納佢人生嘅某一部分(仲可能係好大部分!)。相反,如果佢啲兄弟鍾意你,你會得到更多意想不到嘅好處……男友會更愛你,只係當中最基本嘅收穫!

好處1:如果男友嘅兄弟對你印象好,甚至將你當做自己人,恭喜你!你已經得到大部分嘅支持者,女友地位自然更加穩固啦。

好處2:當自己女朋友喺朋友圈中得到唔錯嘅評價,男人往往都會更尊重呢個女人,咁你又有分加啦!

好處3:男人都希望自己嘅女友係搶手貨(雖然唔想被搶走),當知道朋友都鍾意你、覺得你好嘅時候,佢會覺得好開心,更加鍾意帶你喺身邊。

好處4:同男友嘅兄弟成為好朋友,你可以知道更多女人唔知嘅男人秘密、心事,對增進你嘅兩性溝通技巧好有幫助。
 

LOAD MORE