編輯試食:新麻浦蛋圈三層架韓燒

by Cynthia

韓國餐廳越開越多,CG!編輯部特別精選幾間韓國餐廳去試食,睇吓邊間最值得去!第一間試食嘅餐廳就係喺銅鑼灣排長龍嘅新麻浦,當中最吸引嘅,當然係近期新興嘅蛋圈韓燒

店名:新麻浦BBQ

環境:★★★★☆

尚算闊落,卡位亦坐得幾舒服。

食物:★★★★☆

前菜款式唔少,當中黑芝麻醬沙律隻醬好特別,味道唔錯。

爐邊蛋圈內有泡菜,雖然份量唔算多,但3-4人食都好足夠。建議要早少少食,烤太耐蛋會變老。

牛肉壽司會由職員即場火炙成半生熟,感覺特別,但味道與普通壽司分別不大。

點了3-4人份量嘅豬牛肉套餐,3個女生食用的話剛剛好,如果4個人的話可能要再點其他食物先夠食。部分食物不足4件,例如蝦就只有2隻,菇類的份類亦好少。

香腸中間夾有芝士,好味,燒年糕亦有驚喜。豬肉有兩款,不過五花肉同主打嘅護心肉都無乜特別,反而牛肉幾好味,肉質鮮嫰,肉味又夠香濃。

另外甜品刨冰味道都值得一試,冰刨成好乾身嘅粉狀,質感似棉花,夾埋黃豆、黑糖同紅豆食好好味。個人認為味道同韓國當地食嘅刨冰有得揮!

服務:★★★☆☆

店員唔算特別helpful,除咗最開頭有幫手燒之外,基本上嘢食都係要自己燒。整體而言,服務中規中矩。

新麻浦BBQ
地址:銅鑼灣波斯富街24-30號寶漢大廈2樓
電話:2561 6268
價錢:人均消費約$200-$300
備註:試業期間,惠顧韓燒免費奉送蛋圈。

LOAD MORE