與前度做SP是錯嗎?

by Miss Sex

Dear Miss Sex,

同前度發展成SP (Sex Partner)關係是錯嗎?

我同前度男友一齊唔夠一個月,他主動提出分手,原因是他發覺自己無時間亦未ready好拍拖,想專注事業同考試。雖然不想承認,但我知道他只係唔夠愛我,(他不是playboy格,係害羞老實型,對前度亦好專一長情。他事後有同我講過好內疚無考慮清楚就同我開始)。

分手後一直維持曖昧關係,他曾經表示過想同返我一齊,但由於他未肯定,唔敢貿然行動,話唔想再傷害我,最後只係keep住做朋友,不過談論的話題越來越大膽三級。

發展至今,我倆仍是單身,變成了大家有共識的sp關係。我有睇過Miss Sex你寫的《有性無愛,你得唔得?》,我自問真係做唔晒你寫的mental notes。我同前度都好享受大家在床上的互動,他知道點樣令我興奮,所以特別有快感。

另一方面,我覺得他其實有少少利用我對他餘情未了而繼續呢段SP關係。我曾經想過,他會唔會上床後想我做返他女朋友(我哋一齊時間太短,之前無發生過性關係),但我知男人可以將性同愛分得好開,亦明白如果他只因為我技巧好,可以滿足他慾望而要求復合,我只會自覺好cheap,亦不希望單靠性留住男人,所以亦不敢多想,只想enjoy sex。

我曾經問過他點解要找我做sp,他話因為一齊過,對我有good feeling,有基本了解,他不敢隨便找人做sp,怕信唔過。

另外我亦唔明他究竟點諗,他好鍾意同我上床,但又會叫我快啲揾個錫自己的正常男朋友(我哋共識係是但一方有伴侶就終止sp關係,他又好顧及我感受,成日話如果我唔想的,隨時可以停);他成日提醒我而家已經唔係他女朋友,但他連工作上的不順或較私人的家事都會找我傾訴,其實同之前拍拖的時候分別不大,他究竟當我係咩?原諒我自己都好矛盾,所以有啲長氣⋯⋯

我一方面好想繼續享受他肉體上帶來的快感,但另一方面我亦怕自己會接受唔到他會追第二個或者有新女朋友,我究竟應該繼續呢段關係嗎?

迷茫的小女人上

Dear Confused Courtesan-to-be,

恕Miss Sex坦白,男人找前度做SP,不外幾個原因:1. 方便,唔使又呃又氹,做生不如做熟;2. 唔會上身,兩人名正言順已分手,他可以繼續保留追更好的權利;3. 乾淨,好過找「專業人士」。

知道這個殘酷真相後,你還問自己應唔應該繼續下去?Miss Sex覺得,在性的範疇,無話對錯和應唔應該,只有你情唔情願。

你成日想知佢諗乜,就顯示你內心深處,唔甘心兩人關係中只有性,還抱着他最終會愛上自己的希望。這是好多女人的弱點,以為自己玩得起,實質發現自己蠢咗:我不過想男人愛,卻走捷徑要了性。

佢叫你快啲搵個正常男友,不過用個比較動聽的方法話你知佢唔會做你男友。Miss Sex說得夠清楚吧?

那麼,可以點做?

你可以乜都唔做,繼續停留在這種迷茫狀態,直到後果來收拾你,例如他找到女友,令你迫住死心。

你也可以令自己好忙,日子充實到唔得閒理佢。有時女人被男人玩弄於股掌間,就是因為太無聊太得閒。

還有可以堅強起來,忍住寂寞,想想如何提升自我價值,準備好自己遇上那個將你捧在掌心裡的男人。到時你會發現,he doesn’t deserve you。

希望你有力量抽身。做唔到,Miss Sex也會明白。

Love,
Miss Sex

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE