安全套不安全?

by Miss Sex

使用安全套避孕有不少好處,例如將避孕責任交俾男方,需要時用,唔使女人定時定候打針食藥,而且這個阻隔避孕法可有助防止性病傳染,尤其唔係好熟對方的性愛歷史或唔sure對方是否單一性伴侶,用避孕套就穩陣得多。

安全套成功避孕率supposed to be 99.8%,不過意外就在你意料之外,用套都出事,多數係使用方法不當,導致精液漏出流入陰道。Miss Sex同大家溫故知新,教大家使用安全套的正確方法和如何避免洩漏意外。

首先要注意安全套的有效使用日期,過咗期唔好用,並將安全套儲存在陰涼乾爽的地方。假如見到個套變哂色或爛溶溶咁,緊係唔好用。

安全套必須在性交前戴上,而不是中途或臨射精先戴,因為射精前分泌的前列腺液也含有少量精子,雖然成孕機會不高,但仍有機會導致懷孕。

唔好以為用兩個套就有雙重保護,咁樣只會令兩個安全套產生摩擦力,爛得仲快。

從包裝袋拎個condom出嚟,一定要小心翼翼,唔好太粗魯搣爛咗個套,或太wild用牙咬開。幫男人戴套亦要同樣小心,避免指甲和首飾等刮到個套,造成缺口,導致安全套在做愛期間破裂。

戴上時,一手捏緊安全套頂端,以擠出空氣來盛載精液,另一手則將安全套慢慢捲到陰莖底部,同時擠出裏面多餘的空氣。

戴上後,可在安全套上塗點水溶性潤滑劑(記緊不要用油性潤滑劑,會破壞安全套表面),以減低摩擦力,預防安全套破裂。

最後,射精完要盡快抽出,趁男方還勃起便按緊安全套邊拉出,否則”hea”多兩”hea”,陰莖變軟就有可能導致精液洩漏或安全套鬆脫。即使射完仲硬,穩陣啲都係箝實安全套邊緣,唔好留有手尾。

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE