4招應付負能量朋友!

By COSMO

 
有一種人,平日總會怨天怨地,總之一開口就無句好,從來只報憂不報喜,長期以無限量負能量轟炸你。究竟你身邊有無呢類人?又應該點應付佢哋?
 
負能量朋友的特徵
 
‧有佢講,無你講:「傾談」對佢哋絕非雙向,而係單向嘅訴苦。而且無論你話你有幾慘,佢哋永遠都會堅持「你一定唔夠我慘」。
 
‧否定所有忠言:當其他人嘗試開解佢哋嘅時候,佢哋總會用「你唔明」、「你未遇過」、「你唔知咁多」等去否定人哋。
 
‧用感覺代替思考:最愛憑感覺行事,即使事情過去咗依然繼續唔忿氣,而且怨來怨去都是三幅被,唔肯move on。對別人的理性建議,完全無法process,只懂繼續不停抱怨。
 
‧活在自己世界:佢哋對任何事嘅態度總係對號入座、捕風捉影、無限上綱上線,將幻想出來的不幸全當成現實。
 
‧選擇性失明:對事專挑負面來看,對人專挑缺點來批評,佢哋眼中嘅人和事總是灰暗一片,所以除了怨天尤人外,別無他法。
 
 
如何應付負能量朋友
 
負能量會傳染,苦只會越訴越苦,所以面對呢類逢人怨朋友,如不能保持距離,亦緊記要適可而止地接觸,以免自己也「中招」。
 
‧保持沉默:你作出嘅任何回應,即使係反駁,都會正中佢哋下懷,俾機會佢哋滔滔不絕地咁一再重申自己嘅「慘況」。反而你粒聲唔出,佢哋就會無癮地知難而退。
 
‧轉換話題:當佢哋一開始怨天尤人時,你就即刻轉話題,講一啲無傷大雅嘅八卦有趣事情,盡量將air time充塞住唔同話題,等佢哋無辦法「乘虛而入」訴苦。
 
‧人海攻勢:遇着佢哋糾纏不放,而你又無辦法推辭,最好搵多幾個共同朋友一齊面對,你一言我一語嘻嘻哈哈應付過去,逢人怨小姐亦唔好意思喺咁多人面前怨來怨去。
 
‧朋友義務:做朋友要講義氣,但亦要衡量一下自己條底線係邊。朋友愛抱怨,聆聽都需要適可而止。如果你認為你嘅負能量朋友仲有得救嘅話,不妨狠下心腸,將佢嘅弊病一一數出,然後建議佢哋點樣面對解決問題,話唔定佢會肯改。如果你衡量過,知道佢唔會接受到現實,講出嚟只會傷和氣,就唯有同佢保持距離,等佢自己慢慢成長。
LOAD MORE