約會時要做個識「講」女!

By COSMO



某啲女生喋喋不休嘅說話方式會令男生倒盡胃口,要增加約會(第一次及繼後的)成功比率,面對心儀異性唔係扮啞唔講嘢,亦唔係一開口就唔收掣,其實說話內容先係重點!唔好只係風花說月或講無謂嘢,一般約會只由一個鐘到幾個鐘不等,何不抓緊機會講吓自己,展現你獨有嘅魅力呢?

表現自我三步曲

唔係人人天生都識得表現自我,但至少以下三部曲係一個好開始。

  1. 了解真我

    先講5樣關於自己嘅事,係會令男生對你更有興趣/欣賞/覺得可愛……

    講唔出嗎?其實好多女生都講唔出,多數都係覺得自己平凡、普通人一個,有手有腳有眼耳口鼻囉,都無咩厲害嘅經曆,所以無咩好講。實情係,一個女生嘅吸引力毋須靠一啲偉大嘅事蹟去呈現。坦白講,你都唔會要求約會嘅男生識七國語言、去過南極探險吧!每個人本身都有一啲吸引人嘅特獨故事,點解唔花啲時間去尋找自己嘅故事呢?



     
  2. 故事要點到即止

    對方覺得同你合拍、夾得來、磁場互相吸引先會覺得你嘅故事有趣。講動聽嘅故事係需要技巧嘅,記住唔好犯女性說話嘅通病:喋喋不休地呈現鉅細無遺嘅細節,例如你想講今日公司發生嘅搞笑事,只講重點爆笑位就可以,如果你由早餐食乜開始講起,再有趣嘅都會變成沉悶。
     
  3. 向新相識嘅男生講故事嘅技巧:精簡

    請參考以下例句:「我學緊鋼管舞」、「我鍾意聽住rap music跑步」、「我得閒會做動物義工,同狗狗散步,不過我鍾意貓多啲」、「上年去咗意大利旅行,放縱地吃喝玩樂,好想再去多次。」

    用呢類嘅簡單直接嘅語句同男生溝通,細節就留返同閨中密友講吧(或者等佢成為你密友時先講)。




    小心控制話題

    女性係溝通能手,當遇上話不投機或對方好似跟唔上時,出手轉話題吧!唔好抱怨點解男生唔搵話題。初次約會不宜談及嘅負面話題包括:

    點解仲未結婚?/拍散拖/未拍過拖/拍過好多次拖/政治見解/家事/同前度嘅恩恩怨怨/詳盡嘅工作報告等……

    觸及咗呢類話題,只會令雙方都覺得不是味兒。因此約會時,你要識得控制話題及平衡對答,令大家有正面感覺嘅溝通,當男生講得太多你唔感興趣嘅話題時,主動拋下一句關於自己嘅引子,等佢可以順勢而談,佢會欣賞你嘅交流令約會順利進行。如果話題漸漸傾向負面,如觸及離婚、疾病、工作等等,可以先附和一兩句,然後轉向正面話題。
LOAD MORE