假如我搵錢多過男友……

by Jan

喺傳統嘅觀念上,總會覺得男人應該比女人搵多啲錢,但現今嘅社會,女人搵錢多過男人已經越來越普遍,假如你嘅人工比男友高,係咪就代表會影響到雙方嘅關係呢?

衡量多方面

其實一段愛情關係入面包含好多元素,錢唔係最重要,即使你人工高過男友,但亦要睇對方愛唔愛你、人品好唔好、有無責任心、照唔照顧到你……呢啲反而先係重要嘅元素。其實只要對方唔係問你拎錢或借錢,養到自己,唔會「食軟飯」,其實又有乜大不了呢?最緊要兩個人一齊開心。

當然,每個人嘅生活方式同背景都有分別,萬一男友嘅人工真係低自己好多,雙方喺日常生活上相處都出現問題,甚至你屋企人都好介意,努力後都難以磨合的話,就要好好考慮大家係咪仲可以繼續一齊喇。

唔好俾壓力對方

當然,男人嘅自尊心比較強,會好介意自己人工比女友低,甚至驚你或其他人睇唔起佢,你可以做返自己,唔好比壓力佢,盡量減少令佢有hard feeling,例如出街食飯俾錢可以一人俾一餐、去旅行可以AA制……

放眼將來

雖然對方人工可能比你低,但如果佢有上進心,會為咗你而努力,都係一件值得欣賞嘅事。而且佢人工低過你可能係暫時性嘅事,有時會因為際遇問題,而令佢喺事業未能更上一層樓,你亦可以留意佢嘅理財能力,即使人工比你低,但如果理財能力比你高,又識儲錢,咁你都唔需要太擔心,反而應該俾更多支持對方,同佢共同努力建立你哋嘅將來。

LOAD MORE