星宴夏日時令健康菜餚!

by Karen C.

我成日都好佩服煮中菜嘅廚師,因為中菜要煮得好食,係要有一定嘅功架!最近,星宴中餐廳嚟咗新主廚黃偉文師傅,仲特別推出夏日時令健康菜餚,好開心今次可以試到黃師傅嘅手勢呀!



黃偉文師傅擁有超過20年入廚經驗,於多個本地高級食府磨鍊廚藝、鑽研美食藝術,而且堅持親自為廚房挑選材料,好有heart架!第一眼見到黃師傅,我覺得佢好後生,大家話係唔係?

呢個夏日套餐共有6道菜,其中一道係甜品,當日我就試咗以下嘅菜式:

星宴拼盆
包括香麻海蜇、化皮乳豬件、蜜汁半肥瘦叉燒,其中我佢嘅叉燒最得我歡心,蜜汁甜度適中,而且好腍又唔鞋口。

黑蒜炖響螺湯
我自己本身都好鍾意黑蒜呢個食材,但係用嚟煲湯就第一次試,幾特別,雖然係黑蒜,但唔會好搶味,保留返響螺湯本身嘅味道,而且感覺好滋補添!

花彫蒸蟹鉗
蟹鉗下面嘅蒸蛋好滑,蟹鉗好大隻,啖啖肉,仲鮮味十足!而且好欣賞佢拆殼拆得好乾淨,唔會留咗啲殼碎喺蟹肉上。

魚湯水東芥
不得不讚佢嘅魚湯,好鮮甜,除咗食晒啲菜,我哋仲飲晒啲湯,一滴不留!

鮑魚荷葉飯
鮑魚夠腍身,仲幾入味,下面嘅荷葉飯唔會好黏身,就算已經食到飽飽地都忍唔住食晒。

楊枝甘露
成碗都好足料,而且比起平時食嘅楊枝甘露質地較濃稠,如果鍾意食濃稠啲嘅人,應該都會鍾意食呢個!仲有仲有,因為我本身唔鍾意食太甜,佢呢個甜度好啱我口味呀!

價錢:每位HK$598(另加一服務費)
供應期:即日起至2014年8月31日(午餐及晚餐亦有供應)

LOAD MORE