異地戀點keep好?

by Chris

因為升學或事業關係,同男友被逼分隔兩地,當然會有好多擔憂同不確定性,喺其他人都唔睇好嘅情況下,唔通打定輸數由得時間將感情沖淡就算?不如試下以下方法,睇吓幫唔幫到你?

1. 拒絕誘惑,互相坦白

面對誘惑,例如有男仔追你,除咗要堅定say no,仲應該要對佢坦白,講俾佢知有件咁嘅事,同埋你已經拒絕咗嗰個人,以坦白換取信任,亦係對自己嘅定力嘅一個肯定。相反,當你聽到對方有咁嘅艷遇,千祈唔好呷醋,應該大方一啲,欣賞對方嘅坦誠同專一。

2. 溝通不重時間,重質素

而家手機軟件咁方便,隨時隨地「見面」其實無難度。但傾得耐亦未必等於好,尤其有時差,大家作息時間唔同,唔可以再好似以前咁煲電話粥,應該點到即止,喺短短嘅交談入面互相分享生活點滴,令大家仍然可以了解對方嘅生活。如果講電話成為一個負擔,似乎係本末倒置呢!

3. 小禮物大愛意

雖然網絡可以令你哋無間斷地chat,但又點及親手觸及嘅物件窩心呢?知道佢鍾意邊隊球隊,可以送件波衫俾佢;夏天已到,送一對拖鞋俾佢去沙灘時著。不時寄啲小禮物製造驚喜俾對方,甚至用寄信代替WhatsApp/email,用幾張即影即有相代替send相,相信佢見到你嘅小禮物會好掛住你!

面對困境而不乏自信嘅人會講:「唔係因為見到希望先堅持,而係因為堅持才見到希望」。所以,異地戀keep唔keep到,就視乎你哋雙方有幾有心去維繫呢段關係了。

LOAD MORE