編輯分享:仿如置身泰國的spa體驗

by Cynthia

平時成日都要坐office工作,好易會腰酸背痛,所以我都好鍾意做spa,令自己身心放鬆下。不過通常做spa都係喺泰國,最誇張試過以前去曼谷旅行嘅時候,日日都去做spa!但原來喺香港都體驗到好似泰國嘅spa,我之前就特別去咗THANN體驗一下佢哋喺香港開嘅spa

泰國品牌THANN本身喺泰國都有spa,仲被國際權威旅遊雜誌 Conde Nast Traveler 選為55間最佳spa之一,全店都採用THANN純天然的spa護理產品,所有治療師仲喺來自泰國,具有專業資格及多年豐富經驗。

一踏入THANN spa,就已經覺得裝修好有泰式感覺,加上香薰嘅香味令人好relax。今次試嘅係THANN Sanctuary 特色經典按摩,之前要填一份問卷,等治療師了解你嘅需要,例如力度嘅大細、想重點按摩嘅部位,又或者有咩地方係唔想按等等,非常細心。之後治療師就拎咗幾隻唔同味道嘅按摩油俾我試聞,然後揀出最鍾意嘅香味。

療程房比想像中大,裏面仲有埋淋浴間,由沐浴露、洗髮乳到卸妝油等等,全部護理用品都係THANN嘅出品。首先治療師幫我清潔腳部(步驟真係同泰國一樣!),然後再淋浴沖一沖身。之後治療師正式開始幫我按摩,呢個signature massage主要係運用掌心、拇指和前臂嘅按壓為身體進行深層按摩,對舒緩因長時間使用電腦工作而令雙手、肩膀疲勞、腰酸背痛或運動後造成嘅肌肉繃緊特別有效。治療師力度都足夠而且按嘅位置好準,平時做嘅按摩主要都係用掌心嚟按,呢個按摩就特別用埋前臂按,舒壓效果好似更明顯。我特別要求重點按膊頭同小腿位置,做完之後感覺好鬆好舒服。

完成咗個按摩之後,治療師仲會送上茶同新鮮水果,感覺所有安排都好細心,真係可以完全relax到!

THANN Sanctuary 特色經典按摩  ($1,200/90min)

THANN Sanctuary
地址:尖沙咀廣東道11號海港城世界商業中心10樓1010-1011室
營業時間:星期一至日 (10am- 10pm)
預約電話:3689 4391
網址:www.thann.com.hk

LOAD MORE