愛得太緊?學習愛得更從容!

by Chris

驚佢亂使錢,驚佢唔為未來打算,又驚佢睇女仔,仲驚佢出軌?一諗起佢嘅「惡行」你就立即精神繃緊?究竟點樣先可以愛得輕鬆一啲?

佢係月光族?

買模型,又買波鞋,仲要換埋手機,佢係名副其實嘅月光族?與其每一日check住佢銀包剩低幾多錢,不如同佢坐低計下條數,搵一啲適合佢做嘅小投資或者儲蓄計劃,等佢知道3、5年後可以儲到一筆錢,咁佢就唔會每個月都使到盡。

佢無計劃未來?

未來係需要計劃,但唔好每一個step都捉住佢行,不如聽下佢對未來有乜嘢期望?如果無,不妨由啲短期計劃着手,即使唔係啲咩大計,例如學韓文、上調酒課程,擴闊咗眼界同圈子,可以幫佢對未來有個更清晰嘅方向。等佢對未來有返啲planning,再漸漸將計劃時間拉長,自然會進步到有更長遠嘅計劃。但要記住你唔係佢老闆,切忌逼得太緊。

佢成日同女仔接觸?

Hey Girl!Easy!首先你應該要對佢同自己有足夠嘅信任,日常社交好難避免同異性接觸。佢一同其他女仔接觸你就好緊張,其實係無信心同佔有慾嘅表現。向佢問長問短其實無乜作用,如果佢有心欺騙你,又咁易比你「盤」到咩?試下同佢約法三章,如果佢同其他女仔單獨見面,要事先同你講。同時你亦要相信自己,你哋嘅關係可以經得起考驗!

你要記住,一段健康嘅戀愛關係,係唔應該有過分嘅緊張存在,如果你唔習慣去放鬆啲面對,直到佢覺得你太煩,應付你太傷神,咁就適得其反喇。

LOAD MORE