編輯試食報告:沙田18新菜式!

by 韋寶

每次到沙田18食嘢都係一種享受,因為呢度嘅菜式同甜品都整得非常好味!
好似呢個黑椒南瓜雞脾菇粉果 ($52 / 3 粒)同大漠京蔥牛肉煎包 ($98 / 4個),前者以南瓜蓉製成薄薄的粉果皮,入面包住用黑椒調味嘅雞脾菇粒,清淡得嚟又惹味,而後者則充滿肉汁架!
至於麻醬涼拌蕃茄 ($118)同話梅水晶冬瓜($98)都好啱夏天食,前者嘅醬料係以北京六必居嘅麻醬混合芥末籽油製作而成,而後者充滿話梅嘅香味,非常醒胃!
要數最鍾意嘅,就係仁稔蒜香蒸開邊虎蝦($298)同砵仔鮮茄鱈魚銀針粉($198),虎蝦以東莞豉油、仁稔及蒜蓉蒸煮而成,無論賣相同味道都很不錯!而銀針粉微酸嘅味道,配上充滿魚油香嘅鱈魚,令我食咗整整一碗呀!
無論你已經食咗幾多嘢都好,千祈唔好錯過呢度嘅甜品,因為我平時同行家講開,大家都係讚不絕口架!今次我就食咗紫米薏仁棗茸煎軟餅($52) 、南乳曲奇雪糕($38 / 1球)同綠茶芝士蛋糕 ($70)。軟餅充滿紅棗嘅香味,而且入面包住紫米及薏米,感覺好味好健康。南乳曲奇雪糕則用上紅腐乳自家製作南乳曲奇,味道好特別,因為好似食緊雞仔餅咁!至於綠茶芝士蛋糕嘅茶味同芝士味並重,唔會比對方搶咗個味,真係唔錯架!

地址:沙田澤祥街18號沙田凱悅酒店4樓
 
LOAD MORE