Paul & Joe甜心仲夏!

by Cynthia

每次唔同品牌推出限量品化妝品我都會好期待,因為總會有唔同嘅驚喜,而且packing通常都好靚,吸引到你會想買嚟收藏。近排有好多新嘅夏季彩妝推出,當中都有唔少令人眼前一亮嘅新品,好似Paul & Joe推出嘅夏季系列,顏色繽紛,望落去已經覺得好甜美。

首先係呢個三色旋風胭脂,每款混合3種色澤,靈感來自雪糕新地,每款胭脂都會帶有配合返個色嘅香味,你會聞到有草莓新地、鮮果雪葩及朱古力雪糕嘅味道,好得意。

三色旋風胭脂 $280 (3款色調)

而唇彩亦都加上咗軟雪糕般嘅雙色旋風圖案,含有閃亮鎖水成分,質感順滑又可以為唇部加添亮澤感。

夏日旋風唇彩 $230 (3款色調)

最後唔可以錯過嘅係夏季限量pattern嘅面油紙,取材自PAUL & JOE 時裝系列嘅印花布圖案,以美腿貝殼卡通為主題,設計可愛,同埋細細包好適合隨身攜帶吸油補妝用!

2014 夏季限定圖案面油紙 $ 50

2014年6月4日至17日於銅鑼灣崇光百貨美容專櫃、尖沙咀麼地道K11藝術購物館、旺角朗豪坊、九龍塘又一城 、屯門V-City PAUL & JOE 美容專門店及PAUL & JOE網上購物平台優先發售,其他地點於2014年6月16日起公開發售。

LOAD MORE