同媽媽有衝突,點解決?

By COSMO

作為女兒,總係有時會同媽咪意見不合,甚至乎發生小衝突,究竟發生呢啲事嘅時候,應該點處理呢?

期望與滿足
女兒同媽媽之間產生嘅衝突,概括嚟講即係媽媽有期望,而女兒喺滿足自己定係媽媽嘅期望之間有所掙扎。要劃清一條界線難度頗高,首先你要認清並確定自己嘅感受同需要,肯定自己嘅價值,先有能力去睇吓自己可以俾幾多?邊啲方面有能力令媽媽開心,邊啲需要堅持。

一啲小衝突,做女兒嘅不妨從生活環境、可能度、有咩選擇入手,睇吓可以俾媽媽啲咩。一啲嚴重違背自己意願、價值觀嘅事,就唔好隨便應承,採用拖延策略,以為慢慢將事情丟淡就算,咁樣好可能會令媽媽停留喺等待同失望當中,要知道媽媽有時候係好單純,對子女完全信任,咁樣只會形成惡性循環,將衝突加劇。不妨簡單清晰地向媽媽說明你嘅想法同意願,即使她唔能夠完全接受或明白,但起碼知道你嘅底線。咁亦都係一個讓彼此溝通同成長嘅好機會。

搵出媽媽嘅強與弱

媽媽都係人一個,無絕對嘅權力,都無絕對嘅破壞力,佢有缺點,亦都有好多優點,我哋嘅任務係發現她嘅強項同弱項,睇吓自己可以點樣同媽媽連繫起來。雖然我哋好可能喺細個時已被塑造了,但我哋都仲有能力同空間去modified、revised自己。

首先我哋要搵出係乜嘢令你同媽媽之間起咗衝突。例如媽媽自小到大堅持教導你:女仔唔好太主動,要等男仔約你先矜貴。潛台詞係:唔好嫁一個你鍾意佢多過佢鍾意你嘅男人,咁樣你先係強勢嘅一位。而你接收咗:你永遠唔可能從一個你愛嘅人身上得到同等嘅愛。

當搵出咗媽媽影響你嘅部分後,將你自己相信嘅、認識嘅同媽媽嘅規條比較一下,就可以得出你自己想要嘅東西了。

LOAD MORE