缺乏性空間的男女

by Miss Sex

Dear Miss Sex,

你好,我在網上面見到你回答人哋啲問題好好,我都有嘢想請教你。

我而家30歲,女朋友26歲,拍咗拖5年,感情都算穩定,佢係我初戀女友,但我唔係佢初戀男友。拍咗拖3個月就做第一次,之後有機會去旅行或屋企無人時就做,零零碎碎都有幾次,但之後一直都無,到而家差唔多成年無做了,你覺得正常嗎?

佢俾我嘅藉口係想等到結咗婚先,保留對大家的新鮮感。其實到呢一刻大家都視對方為結婚對象,都咁大個人,有時做吓好正常啫。但有時又諗,成日諗住做愛好似俾下面控制咗自己咁,好煩惱。

到底我女朋友係性冷感,定係淨係唔想同我做,定係佢唔夠愛我呢,我好唔好維持現狀到結婚呢?

希望你睇完覆返我,最好有解決辦法啦,哈,謝謝!

Leonard

Dear Lusting-for-love Leonard,

對於生活在性空間缺乏的香港,未同居未結婚的男女一年做得幾次愛,我諗都算正常。

唔正常或者唔健康嘅係,其中一方長年累月忽略另一方的需要,或根本唔諗住俾力去經營好關係。

站喺Miss Sex立場,如果你有俾力去製造性空間,又清楚表達了你的需要和諗法,而對方不是基於宗教或外在原因將你拒諸於外,咁你要認真想想是否願意屈就於這種有愛無性的關係。

不要矮化自己的性需要,想同女朋友做愛係正常不過的事。Miss Sex亦覺得無謂寄望結婚後性生活會一下子變得熾熱起來,婚前把火都燒唔起,婚後更加唔使旨意開到個爐。不是Miss Sex悲觀,是統計數字以及實際觀察得來的結論,除非你覺得自己會是個例外。

至於女朋友會唔會唔想同你做或唔夠愛你,Miss Sex無法從你的片言隻字得知。不論伴侶是男或女,Miss Sex給的意見都是:不要理佢講嘅一套,只需理會她的行動你是否接受得來。

當然,在非常現實的世界裏,好多男女會因為各種奇形怪狀的原因而留在一段關係裏甚至結婚,不一定那麼理想的有性有愛。This is your life,你得自己抉擇。Miss Sex唔會幫你揀。

希望Miss Sex沒有幫倒忙。

Xoxo,
Miss Sex

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答

LOAD MORE