見工必勝小貼士!

by Ella

 
唔少應屆大學生都已經考完試,喺時候開始努力搵工,想見工成功,就要睇吓以下幾個小貼士:
 
問清細節:部分大公司嘅面試會包含written test、group interview、individual interview,可能係同日或者分階段進行,唔好怕麻煩唔敢問,通常負責打俾你嘅HR都會樂意解釋返個面試程序,知多啲對你做準備都有好處架。
 
切忌遲到:早一日諗定要著咩衫,執好要帶去嘅嘢,以免當日浪費不必要嘅時間喺執嘢或者襯衫上。見工當日就要最少早15-30分鐘到達,俾人一個well prepared嘅好印象。
 
預備對答:唔好諗住去到打「天才波」,覺得可以去到睇吓人哋問咩先見招拆招。有幾條問題,例如「請你介紹一下自己。」、「你覺得自己有咩優點/缺點?」、「點解你認為自己適合呢份工?」,幾乎都係必問嘅。預先諗定一個合適又得體嘅答案,好過到時即場諗答到一嚿嚿。
 
Thank you e-mail:呢樣嘢唔係must,但如果見工當日覺得表現唔錯,而你亦有少少嘢想補充,可以禮貌地send返個thank you e-mail,多謝對方俾機會你面試,順道補充返一啲你漏咗講嘅重點,例如你對份工嘅興趣同熱誠、你覺得自己有咩特質/經驗令你適合呢份工。如果你係僱主心目中嘅幾個人選之一,呢個e-mail可能會為你爭取到一個機會!
 
LOAD MORE