拍拖幾星期後已變平淡,可以點做﹖

By COSMO

Dear Joven:

我今年20歲,對愛情認真,認為係有將來先會拍拖。同同年嘅前男友一齊咗3年,一直離離合合,最終分開咗。 之後識左一個大我5年嘅男仔,佢對上一次拍拖大槪係半年前,俾個女仔傷得好深,佢話佢一開頭同個女仔好好,好甜蜜,咩都做過去過,但最後一齊咗8個月個女仔派好人卡俾佢,就分開咗。佢因為呢件事傷得好深,開始成個人變哂,但佢話遇到我後覺得同我相處好舒服,咩都可以講,開心咗,俾到好多感觸佢,所以就一齊咗。

未一齊嘅時候,我都主動做好多嘢俾佢知道我對佢有意思,佢都好細心,好體貼,會突然接我放工,差不多日日見,當真正開始頭兩三個禮拜時,都好sweet,都會講吓掛住對方,返工返成點,會講吓電話,可能講嘅時間唔長,次數唔多,但我覺得ok,因為我自己本身就唔係好鐘意講電話。佢亦都會帶我見佢父母、親友。到慢慢,起身返工唔會講,瞓咗覺都唔知,可以全日無講過電話,可以講講吓幾個鐘唔覆訊息唔見人。始終我覺得一開始應該係會經常見面,講吓電話,周圍去,做啲咩會同對方講,會緊張對方,拍拖耐咗會咁好正常,但至少頭兩三個月熱戀期唔應該會咁,點解大家一齊咗無一個月就好似好平淡咁,好似一對相處咗好耐嘅情侶,係我俾唔到甜蜜佢丫,定係佢根本未打開個心去接受新一段感情,定係佢根本放唔低從前?

我睇過佢同佢前女友嘅相,係好開心,做咩去邊食咩都影好多相。當然我無同佢講過我睇過呢啲相。我有同佢好好傾過點解大家相處得咁平淡呢個問題,佢答我因為佢都經歷過唔少,佢都承認自己拍拖方式有變,因為佢大個喇,唔想好似之前咁做嘢唔諗後果,佢唔再係之前咁大情大性,佢現在追求嘅係平平淡淡,同埋自己係一個好需要空間嘅人,但同時空間令佢缺乏安全感,佢話覺得自己好矛盾,但只係想享受現在的每一刻。

我明白佢受過重傷,所以想盡力待佢好,希望好到可以遮蓋佢以前嘅不快,希望可以了解佢,俾到佢想要嘅嘢佢。每次當我唔知佢做緊咩,去咗邊,我從來都唔會打俾佢,怕佢覺得煩,只好等到佢得閒應我。但慢慢,我覺得無咗頭頭熱戀中應該有嘅熱情,平淡得不正常,我真係唔知佢係點,佢係唔係因為愛我先同我一齊,點解我感覺唔到佢係在意我?究竟佢係未放低過去定怕又再受傷所以先咁?我應該可以點做?希望你可以解答到我,謝謝。

Grace

Dear Grace:

即是咁,無明文規定拍拖幾耐會轉平淡,究竟見幾多次、講幾耐電話先叫做似拍拖。這些所有都是兩個人的事,大家要有共識,必須開心見誠討論,達到共識。

至於他被前度傷透的心,沒有其他人可以把它治癒,亦無人可以改變他因此對愛情態度的改變。你可以鼓勵他多向你傾訴、溝通,做個好的聆聽者。不要無謂揣測他的心意,這只會令你諗埋一邊,然後他做甚麼,你都覺得是不愛你的表現。

兩個人,最重要的是核心價值和大方向一致(例如他有誠意和你在一起,他希望有穩定的愛情關係等),其他小波折可以一起解決。

給自己一個時間,若果情況沒改變,你就要問自己,你可以看到和他一起的將來嗎?

CG!們,如果你在生活上遇到甚麼疑難,包括工作、愛情、人際關係,總之生活上的任何事情,都歡迎e-maileditorial@cosmogirl.com.hk 跟我分享及討論啊!:)Subject: ask joven

LOAD MORE