我好似變咗性冷感?

by Miss Sex

Dear Miss Sex,

你好,我同男朋友拍拖三年多,但我哋做愛嘅次數由開始一至兩星期一次,去到而家可以成一個月都無一次。雖然佢口中成日講我哋好耐冇搞嘢,會話「執返劑先」,但我覺得好難聽,甚至聽完更加唔想做。其實起初唔係咁,我都有正常需要,但係佢返工比較累,成日都唔多願郁,好快搞掂就算,甚至咩前戲都無,久而久之令到我無哂mood去做,完全無feeling,好似發洩工具咁,就係因為咁,原本的我好快就會有feel,直到而家我有啲抗拒同佢做愛,但因為有時實在太耐無做,佢都有生理需要,所以如果我唔俾,會搞到好僵,令我不知如何是好。而家的我好似變咗性冷感,對呢方面完全沒有感覺。請Miss Sex指教我應該如果面對及處理,謝謝!

Hoi Yan

Dear Hot Hoi Yan,

女人的性欲相當複雜,除了由心而發,也可以先由身體起動,帶領靈魂進入狀態。情況有點像一個心情不好的人,只要機械性地對鏡子一笑,心情也自然會好起來。

對於無mood做愛的問題,Miss Sex有一黃金法則:做咗先算。身體是很誠實又不講道理的,當一個女人放任身體去享受性,不去想前因後果,往往surprise!做做吓興致自然來,你會驚訝內心的sex goddess原來蠢蠢欲動,一直等你親自來解鎖。

你說自己有正常需要,即不是性冷感啊,Miss Sex看來,你只是對自己的性欲比較消極──只依賴身邊那位給予。而且,也將性想得太死板,「執返劑」咪「執返劑」囉,大家既然兩情相悅,間中做對方的「洩欲工具」有甚麼問題?難道你想他有其他洩欲渠道嗎?

做女人不妨relaxed一點,彈性一點,佻皮一點。身邊那位提不起自己性欲的話,不妨向外求,例如看看韓劇的長腿oppa也不錯啊,嘻。跟咖啡店的barista、問路的帥哥flirt一下,幻想一下,正常女人想變性冷感都難。

Miss Sex腦內更常備一個「電影資料庫」,將看過的juicy床戲儲存下來,留備有需要時回味一下,甚至幫自己進入狀態。最近看了套《Dallas Buyers Club》,發現好man的牛仔也很性感,嘿。

其實性欲和自信一樣,不是靠別人給,而是由自己建立。說不定,當你成為想像力豐富而個性柔軟的女人,身邊那個他自然不那麼求其,知道要俾點力滿足你。

希望幫到你。

Xoxo,
Miss Sex

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE