男友嫌我一無是處,提出分手……

By COSMO

Dear Joven:

今日終於同男朋友分咗手,我有點釋放嘅感覺,不過好驚會後悔。

我同男朋友拍拖一年多啲,佢係一個大男人,好執着、有原則,而我係一個好無所謂,自問忍耐力幾高,咩都貼貼服服,做晒所有我能力範圍可以做嘅嘢去滿足佢,不過我唔聰明,有時個人有啲悶,特別係我男朋友唔開心嘅時候,我淨係識得係佢身邊陪住佢,講啲唔好笑嘅嘢,唔係太識氹佢開心。

我男朋友好鍾意發細路仔脾氣,好小事就會鬧我,會講好多我覺得好多女仔都接受唔到嘅說話嚟激我,會搵我同人比較,我哋有個mutual friend,佢性格同我差唔多,係一個隨和嘅人,不過佢個人係叻過我,我男朋友有時會嫌我蠢、無學識,然後激我話早知追嗰個女仔。雖然我每次聽到都好傷心,甚至有啲妒忌個女仔,不過聽聽下我已經慣咗,就算傷心都會扮無事,我都好想我可以搵到啲嘢比我男朋友欣賞。雖然我唔係叻,不過我自問性格唔錯,但係佢好似永遠都唔會識得欣賞我咁,我一直以嚟好多嘢都好包容佢,有幾多次我傷心到想死,不過我仍然好犯賤去認錯,諗盡辦法去氹佢,佢每次話我,我都會諗,其實我係咪真係咁差咁無嘢值得佢欣賞?每次我認完衰仔,佢下咗火之後,都會同我講,頭先嬲得濟先講嗰啲說話,唔係真心,但係佢根本唔知道佢講嘅說話有幾傷我心……有好多嘢講咗真係收唔返!同埋每次我唔認錯駁佢嘴佢就唔會理我,只會越嚟越嬲,我覺得佢真係好唔識反省自己。

同一個大男人一齊,除咗要忍耐下佢啲脾氣,我知道其實好多嘢都唔使我擔心,佢心情好嘅時候對我好好,好錫我,或者我唔識同佢相處,每次唔開心嘅時候唔可以同佢講,因為佢只會覺得我增添緊佢嘅煩惱,係佢面前我只可以做一個開心嘅我,不過我唔聰明,所以成日蠢蠢地咁好易激嬲佢,到琴晚因為一啲我覺得好小嘅事,佢同我講真係頂我唔順,覺得我好蠢,所以要分手

我哋段關係變得越嚟越脆弱,我同佢講咗好多次叫佢唔好咁衝動,我哋冷靜完先再講,雖然我好多嘢唔識,不過我真心覺得我唔識嘅野對日常生活影響唔太大,我同佢講我會為咗佢令自己叻啲。可能佢真係想要一個好叻嘅女朋友,其實我一直以嚟都有好多嘢壓抑住,我都覺得好辛苦,不過我覺得為咗佢咩都值得。可惜佢提出咗分手,話不如同佢做好朋友,我琴晚好驚我接受咗會後悔,所以話冷靜下先,不過到今朝喺度諗,佢已經唔係第一次講分手,既然佢都想放棄,其實我自己一個堅持仲有咩意思?所以我同佢講,我哋都係做返朋友啦,不過我好驚自己會後悔。

其實我仲係好愛佢,我有無做錯決定?

蠢人

好聰明的蠢人:

或者你平時真的不夠聰明,不過你今次作出了可能是你人生最聰明的選擇 — 分手!!!

我時常強調,維持健康關係不是單方面的靠忍耐和讓步,而是雙方共同找出共識和相處方法。我們也不應為別人改變自己,要改是因為自己想自己好,想自己活得開心。

在我眼中,你的前度是一個賤男。講真,(如果你真係唔聰明)他認識你的時候已經知道,理應不要開始,去找另一個聰明女。

再者,遇到問題,伴侶應有的態度是鼓勵,而不是永恆的踐踏和嫌棄。 如果他覺得你真的一無是處,就讓他離開吧!將時間和空間讓給懂得欣賞你的人。

與此同時,某程度上你也知道自己的弱點(所以你並不蠢),就利用這個空窗期着手改善一下,把自己生活變得有趣,也把自己變成一個你喜歡的女生。

You can do it!!! 加油。

CG!們,如果你在生活上遇到甚麼疑難,包括工作、愛情、人際關係,總之生活上的任何事情,都歡迎e-maileditorial@cosmogirl.com.hk 跟我分享及討論啊!:)Subject: ask joven

歡迎加入Joven Love    Life Coaching Fan page

Joven's Blog - 30 Minute Love Affair

Love

LOAD MORE